“Non iari mai pensu e massimamenti bofiu saludai de fatu de una retrocessioni chi bivu ancora cun dolu e tristura. A dolumannu, perou, non sempiri s’acabbu est bellu cantu su contu”, scrit su portieri Cragno, fiorentinu de Fiesole.

“Funt stetius otu annus galanus meda, ot’annus chi apu tentu sa bonasorti de connosciri unu Populu, cussu sardu, orgogliosu de non creiri, sempiri prontu a agiudai a totus e innamorau comenti de macus de sa terra insoru. Una terra de lassai a buca oberta, chi, prus de mi fairi intendiri in domu fin de sa primu dì, m’at arregalau allirghia manna e is amoris de sa vida mida: pobidda e duas figlias”, sighit Cragno, chi propriu oi fait is bintotot’annus.

Galu: “bolia cun totu su coru finas a torrai gratzias a totu su Populu de is tifosus chi in totu custus annus non m’ant mai fatu mancai s’amori, s’agiudu e calencuna borta finas ant tentu cosa de nai, chi est de certu sempiri meglius de sa fartzidadi. Andendumindi de Casteddu possu nai ca soi cresciu comenti de giogadori e comenti de omini. Non sciu ancora chi possat essiri una urtima borta opuru nosi torreus a biri, ma soi seguru de una cosa calechisiat cosa sussedat: bos apa tenni sempiri in su coru”.

A scriri is saludus a su portieri corus meda de cumpangius de ocannu e de atrus annus: de Vicario a Rog, de Altare a Faragò, de Aresti a Deiola.

Est nova de eris su passagiu de su portieri a su Monza: po un’annu in prestitu chi podit diventai obrigu de comporai po cuindixi milionis de eurus chi sa scuadra de Berlusconi abarrat in Serie A.

Cun Cragno su Casteddu perdit unu de is giogadoris meglius chi apat tentu e funt pagus is portieris de sa storia de sa scuadra sarda chi possant essiri meglius de issu.

Immoi is guantus passant a Radunovic, chi est a nai ca in is partidas giogadas in Serie A ocannu passau at fatu biri cantu ballidi. Augurius mannus a s’unu e a s’atru.

 

 

28 de làmpadas de su 2022

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

 

Foto: https://www.dazn.com/it-IT/news/serie-a/altro-colpo-di-mercato-per-il-monza-arriva-il-portiere-cragno/4444o4zxsgzg1a9s23kbt7s1z