“De seguru ndi eis nau medas…” Errit Claudiu Ranieri candu cumentzat a fueddai in s’atobiu cun is giornalistas, a innantis de sa partida de custu merì contras de sa Juventus. Sa pensada de s’allenadori romanu est a is undixi giogadoris calaus in campu in sa partida cun s’Inter de dominigu passada. “Custu macu, custu beciu rimambiu. Ddu eis nau? Ma est finas giustu de aici, s’allenadori est bravu feti candu bincit. In segus candu perdit at faddiu dogna cosa”.
In Asseminello Ranieri si castiat a is urtimas partidas. “Seus gioghendu beni meda. Ma depeus sighiri in custa manera, poita is problemas funt in dogna partida. Bastat pagu a passai de s’allirghia a su disisperu”.
De Milanu si lompit cun cuntentesa manna, ma sciendu beni ca ancora sa salvetza est de si pigai in campu. Claudiu Ranieri si poderat a sa strinta su puntu de oru pinnigau in San Siro, ma poderat su matessi is peis prantaus beni in terra e pensat a sa cuntierra de custu merì cun sa Juventus. “Est una scuadra chi connoscit eita depit fairi, aici comenti s’allenadori chi dda ghiat. Scint agatai is gol e si difendit comenti de atras pagus in Europa. Funt fortis de averas candu partinti in velocidadi e abistus ateretanti in is bocias giogadas a sa frima. Po custu depeus donai crobb manna. E ancora de prus”.
Ranieri, a dogna manera, bisat un’atra partida chi portit puntus, a pustis sa vitoria cun s’Atalanta e su paregiu cun s’Inter: “Depeus cicai de pinnigai puntus cun chinechisiat. Is puntus chi serbint po si sarvai funt sempiri is matessis. Chi ndi feus de mancu de trintacincu o trintases s’erriscat meda. Immoi est erribau su tempus de spingiri chena farta, chena timiri contras de calechisiat scuadra. Finas poita perunu arresurtau est scritu e ddu eus bidu beni in dogna logu in is urtimas giornadas”.
Eus a biri oi eita at a sussediri!
Màuru Mura
Cenarba, su dixiannoi de arbili de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto:https://www.dazn.com/itIT/home/aeeakmxs88y1wh1a12jc3oljo/5xyrbuxhine114ld3mxln5ovx
