Su centrumanca de Tatari sighit a si trobeddai in su caminu chi depit fairi po donai su nomini de su candidau a sindigu e a sa presentada de is listas. Su Partidu Democratigu sighit a non donai su nomini e a intru de sa coalitzioni, chi a dogna manera abarrat in peis, is atrus cumentzant a si cardeddai. Forsis feti po ponni pressi, ma est craru ca calencunu est arriolau.
Aici, a pustis is fueddus de is Steddaus, lompius lunis a merì, eris funt lompius cussus de Demos, Fortza Paris, Progressistas, Psi e Sinistra Futura: “Seus arriolaus po su tempus adduru cun su calis ancora non teneus is candidaus po Tatari e Salighera – narant totu paris –. Po cantu pertocat Tatari, arreconnoscendu a su Pd sa responsabilidadi de unu nomini, pensaus chi si depat castiai a is signalis crarus chi lompint de sa sociedadi civili”.
Is fueddus parint crarus aici comenti est craru ca is concas de su Partidu Democratigu funt agoa. Eris, in dd’una prasigedda de su centru storicu, s’est fata sa prima festa eletorali promovia de “Aciungi cultura in Tatari”, unu paris de genti meda de sa sociedadi civili chi in is urtimas regionalis funt andaus beni meda. Ddue fut paricia genti, medas acapiaus a su Pd, e piciocus giovunus puru chi funt stetius cumbidaus a ponni in peis una lista, chi a cussu chi si connoscit est giai serrada. Su sciolloriu est ca, in totu custa allirghia, custa genti non tenit ancora unu candidau sindigu.
Lunis, is prus otimistas, iant tentu sa spera de tenni su nomini, ma su mengianu giai s’est chistionau de sa dì in fatu: “est chistioni de calencuna ora, si narat, po acrariri in pagi is dus nominis chi parint is favoressius: Giusepu Mascia, segretariu provinciali, e su sindigu beciu, po duas bias, Giuannifrancu Ganau. In pagi bolit nai chi non si certit a pustis, ca est de importu po binciri contras de Nigola Lucchi, candidau de is civivus, e cun Bainzu Mariotti, su candidau de su centrudrestra.
Màuru Mura
Mercuris, su dixiaseti de arbili de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://it.wikipedia.org/wiki/Palazzo_Ducale_%28Sassari%29
