Non s’est difendia Francisca Deidda. Non at certau cun chini dd’at bocia. Custu at nau s’autopsia, sa picioca de corantadus annus est stetia bocia in su mentris chi fut dromia o castiendu sa televisioni, forsis indromiscada, in pissu de su divanu de domu sua, cun sa conca posta a un’ala. Posta comenti de unu pipiu in sa brenti de sa mama, aici comenti est stetia agatada a intru de su borsoni in Rio Picocca.
Po su bocidorgiu s’agatat in presoni Igor Sollai, su pobiddu de corantatres annus. Po cussu chi creit s agiustissia dda at bocia cun dd’unu corpu in conca, intru de is cerbeddus de a innanti e sa parti destra de sa conca. Po immoi s’autopsia at amostau custu, ma non si scit eita est stetiu umperau po nde dda boddiri aici a forti. Forsis unu manubriu chi benit umperau po fairi esercitzius in palestra, chi non s’agatat in sa domu de Santu Sparau, aunia eris funt torraus is carabineris de su Ris. Is militaris ant cicau in domu, ma non ant agatau nudda.
S’autopsia eris dd’at fata su dotori Robertu Demontis, cun a su costau s’anatomopatologa Giulia Caccia, po indicu de sa Procura, e de Chantal Milani, sceberada de Giuannifrancu Piscitelli, s’abogau postu de Andria Deidda, su fradi de Francisca. Puusti cras at a lompiri in Casteddu s’entomologo Stevini Vanin chi depit donai s’arrespusta po sa dì in sa cali est morta sa picioca. Chi, forsis, est morta sa dì etotu chi est sparessia, su dexi de maju.
Igor Sollai, sempiri po chini est fendu s’indagu, a pustis airi bociu sa pobidda, at portau sa morta in su Sarrabus cun sa machina de issa etotu chi, in segus, at bendiu, nenduduru a chini dd’at comporada de dda samunai beni meda, massimamenti in is sedilis de palas. Boliat bendiri finas su divanu, ma no at agatau perunu comporadori.
Po cantu pertocat s’agiudu de calencunu, a su bocidori, ancora non si scit nudda.
Màuru Mura
Martis, su trinta de mesi de orgiolas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.open.online/2024/07/29/francesca-deidda-autopsia-uccisa-colpo-solo-fronte/
