Abarraus sempiri foras Sardigna e calaus in Sicilia, in sa Valle dei Templi. Seus prontus a bisitai custu logu de ammaju? Sa pregunta chi nosi depeus ponni est cussa chi sighit: Eit’est sa Vallle dei Templi? Facili a arrespundiri, bastat a imbucai in calechisiat giassu de internet e sa spusta nosi benit arregalada: Sa Valle dei Templi est unu parcu archeologicu de sa Sicilia, famau po comenti est allogau e po mori de una meca de tempius doricus de su tempus de is grecus, chi funt de importu mannu. Prus o mancu est cussa chi in s’antighidadi fud Akragas, chi poi at fatu nasciri sa citadi de Agrigento. De su 2000 custu parcu archeologicu est regionali e, de cunsideru ancora prus mannus de su 1997 totu sa zona est imbucada in sa lista de is prendas de s’umanidadi de s’unesco. De totus est pensau comenti unu logu aunia lompint turistas medas, e in prus est unu de is simbulus de sa citadi e unu de is principalis de totu sa Sicilia. Est a nai puru ca su parcu archologicu de sa Valle dei Templi, chi est manna po 1300 etarus, est su parcu archeologicu prus mannu de totu s’europa e de su Mediterraneu.
Sa parti prus manna de is scavus e de su torrai a ponni a postu de is tempius si depit a s’archeolugu Dominigu Antoni Lo Faso Pietrasanta, chi fut nasciu in su 1783 po si morri in su 1863. Dominigu Antoni fut finas Duca de Serradifalco de su 1809 a su 1812. In su mentris de su seculu de binti, is scavus furint pagaus massimamenti de Ser Alexandere Hardcastle. Custu dinari fut serbiu po is scavus e su torrai a ponni eretas otu colonnas in sa parti bascia de su tempiu de Eracle. Po mori de custu su finantziadori est stetiu insigniu de sa citadinanza onoraria de sa citadi de Agrigento, pighendusì su gradu de Commendatore dell’Ordine de sa Corona de Italia.
Sa nascita de sa polis agrigentina est acapiada a su pesamentu de sa polis de Gela: sa citadi, difatis, fut stetia posta in peis in su 581 a innantis de Cristu de calencunu de is abitantis de Gela, chi beniant de is isulas de Rodi e de Creta, cun su nomini de Akragas, chi lompiat de su frumini chi infundit su territoriu. In su mundu antigu Akragas est stetia una de is citas prus de importu po economia e politiga.
Màuru Mura
Dominigu, su dixiotu de austu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.sicilytourist.com/blog/?parchi-archeologici-in-sicilia–la-valle-dei-templi—agrigento
