“Su postu de bosatrus est in sa coalitzioni de su centrudestra sardista e autonomista: po s’ora eus sighiu unu caminu, de importu mannu, paris e depeus sighiri a ddu fairi is unus a su costau de is atrus”. Aici narat, de Terranoa, aunia s’agataiat po un’atobiu provinciali de is Fradis de s’Italia in Gaddura, Pàulu Truzzu, sindigu de Casteddu e candidau de su partidu comenti de guvernadori po is eletzionis regionalis de su 25 de friargiu benienti. Est de pariciu tempus chi si cicat de torrai a portai sa Lega e su Partidu Sardu de Atzioni in sa coalitzioni, ma custus funt frimus in sa pensada insoru de torrai a candidai su presidenti chi at cumandau in is urtimus cinc’annus. Bolint sempiri a Christian Solinas. Ma de subra su palcu de Terranoa, Truzzu, s’est rivolgiu finas a Alisandra Zedda, sa femina de Fortza Italia chi in is dis passadas at fatu sciri de bolliri curriri a sa sola, comenti de indipendenti. Truzzu dd’at cumbidada a ponni “sa cumpetentzia e esperientzia sua” a disponimentu de sa coalitzioni: “Su caminu politigu chi as fatu cun coerentzia, chistionat craru – at nau su sindigu de Casteddu – po custu, finas portendu arrespetu a is contus tus, ti nau ca custa est domu tua. Chi curris a sa sola at essi unu vantagiu po cussa coalitzioni de orrubis e grogus chi at sceberau sa Sardigna comenti de su campu po esperimentus de un’amistade chi non portat a peruna parti”.
Alisandra Zedda, arregodaus, ca po is Regionalis iat a bolli calai in campu cun sa lista sua “Anima di Sardegna”, ma is cosas iant a podiri mudai chi, comenti narat: “Su centruddrestra torrat a agatai s’unidadi”. S’atra d’ at depositau in sa Corti de Appello su simbulu e at nau: “In Sardigna si depit cicai de mudai. Nudda de personali, ma su Guvernu de Solinas est stetiu fatu a sa sola e stentosu meda. Po cust’arregioni soi bessia de sa Giunta ocannu passau. E po custu soi andada a innanti a sa sola in custus mesis aprontendu sa candidaura po guvernadora”.
Finas a su 2022 fut sa numuru dus de Christian Solinas e immoi s’agatat a essiri sa candidada de tres po sa presidentzia de sa Regioni. Scit beni ca su candidau Paulu Truzzu est sustenniu finas de Fortza Italia. “De acordiu, narat, ma in su mentris su progetu chi tenia in conca est andau a innantis e immoi no arrespundu feti po mei, ma po totu su interis de ‘Anima di Sardegna’ chi mi candidat a presidenti de sa Regioni”.
Zedda, a dogna manera, torrat a nai ca podit fairi unu passu a palas “chi sa coalitzioni agatat s’unidadi, ca deu non soi in cica de incarrigus né innoi e nemancu in Roma”.
Màuru Mura
Lunis, su cuindixi de gennargiu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.corriere.it/politica/24_gennaio_13/regionali-sardegna-truzzu-fdi-spinge-avverte-il-posto-psd-az-centrodestra-unito-fd61a728-b1ed-11ee-9299-5cd622bffa26.shtml
