Dogna dì agataus calencunu politigu de s’Italia a pigai fueddus po is regionalis sardas chi eus a tenni su binticincu de friargiu. Totus pigant fueddus e parit ca chena su parrer insoru sa Sardigna non ce dda podit fairi a fairi listas e nomenai candidaus presidentis.
De una parti e de s’atra parit, po immoi, chi siant cumpartzius: de una parti Soru cun Todde e de s’atra Truzzu cun Solinas e Alisandra Zedda. Ma ancora mancant una pariga de dis po si ponni de acordiu e is spantus funt in palas de su corrunconi.
“Solinas no at mancu guvernau mali, ma pensaus ca su candidau nostu, Truzzu su sindigu de Casteddu, ddu at a podiri fairi galu meglius. A parti su nù de sa Sardigna, a dogna manera, non mi parit chi s’agatint atrus logus aunia eus tentu problemas”. Ddu narat Franciscu Lollobrigida, ministru de s’Agricoltura e dirigent de Fradis de s’Italia, chistionendu de is regionalis sardas. “Creu – aciungit – chi a s’acabbu eus a agatai unu acordiu”.
Fendu beni is contus, in manera lestra, in is regionis guvernadas de is Fradis de s’Italia e de sa coalitzioni de centrudrestra, narat ancora in dd’una intervista a su giornali Repubblica, “Nosu teneus feti tres regionis in totu in su mentris chi sa Lega cumandat dixiaseti milionis de italianus. Fortza Italia lompit a treixi milionis e mesu e nosu feti otu milionis. Non seus pedendu nudda chi no est possibili, mi parit”.
“Seus sempiri prontus a chistionai de totu – narat ancora su ministru de s’Agricoltura de su guvernu ghiau de sa presidenti Giorgia Meloni – ma nemus bolit chistionai de nudda. Non eus discutiu nemancu de sa Sicilia ocannu passau”. E in pissu de sa possibili candidadura de sa segretaria de su Partidu Democratigu Elly Schlein e de cussa de Giorgia Meloni, chi su ministru iat a bolli, narat: “Elly Schlein si iat depiri candidai. Iat tentu unu bellu arresurtau s’atra bia. Iat essi cosa bona e giusta chi a si candidai iant essiri is tres capus”.
Màuru Mura
Martis, su seixi de gennargiu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://terraevita.edagricole.it/economia-e-politica-agricola/governo-lollobrigida-nuovo-ministro-agricoltura/
