Ca Gigi Riva non fut feti unu simbulu de su Casteddu e de totu sa Sardigna si sciat giai. Difatis est arregodau de dogna tifosu chi tengiat su fubalu, sonumancu cussu de una borta, in su coru. De candu s’est mortu funt stetius medas is manifestadas e is atobius intregaus a cuss’omini chi cun sa magligedda asula at fatu trintacincu gol in corantaduas partidas. Forsis totu custu no iat essi pragiu a su matessi Riva, ca fut un’omini cun sa schina ereta e non ddi pragiat a s’amostai in prus de cussu chi depiat. Ant scritu libburus, fatu film e articulus de giornalis in pissu de su bomber de Leggiuno. Ma po cantu pertocat sa stima e s’amori po Riva bastat a ascurtai is fueddus de su figliu Nigola chi ddu at scoviau in dd’una intervista cun Radiolina: “Babbu non fut de importu mannu feti po is sardus, ma fut bofiu beni in totu s’orrestu de s’Italia”. E po ddu fairi cumprendiri at aciuntu: “Candu andaia in campusantu a ddu agatai, a is ogus mius s’amostaiant, cuasi sempiri, is sciarpas de sa scuadra chi iat airi giogau contras de su Casteddu cussa cida”.
Sussediat, massimamenti, in is mesis a pustis chi Giri Riva si fut mortu. E sussedit galu finas immoi: in su campusantu de Bonaria, in s’inferriada indenanti de sa tumba de Riva si ddue agatant is sciarpas de su Como e de sa Roma, chi funt is duas scuadras chi funt lompias in custu cumentzu de Serie A po si dda giogai contras de is piciocus de Davidi Nigola. Duncas lu logu aunia si pasat po s’eternidadi su corpus de Riva est diventendu de importu finas po is tifosus de is atras scuadras, chi bisitant giai s acapitali sarda, ma non si ndi scarescint de chini dd’at fata manna.
Nigola Riva, po custa chistioni, scrit calencunu fueddu in is social: “Sciarpa de su Como e de sa Roma in mesu a sciarpas medas de su Casteddu nostu, gratzias: est su fubalu cun custu animu chi ddu agiudat a andai a innantis e arregalai ancora bisus”.
Màuru Mura
Cenarba, su ses de cabidanni de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto:
