Su Casteddu de Ranieri cumentzat a sa manera meglius sa parti de dus de su campionau. Petagna bincit sa cursa a su postu de atacanti cun Pavoletti e imbucat in campu de su cumentzu de sa partida. Cun Viola e Nandez chi cicant de ddu agiudai. In difesa, a pustis una pariga de partidas, si torrat a amostai Wieteska. Candu s’arbitru at fatu cumentzai sa partida su Bolgna at inderetura pigau su cumandu e Scuffet at fatu una bella parada a pustis unu tiru de Urbanski de is orus de is seixi metrus. Su Casteddu at arrespustu cun Viola chi at provau unu tiru de distantzia manna. Chi iat airi segnau totus si furint spantaus. Sa scuadra de su Bolgna atsighiu a cumandai su giogu e a sa metadi de su tempus cun Orsolini est passau in vantagiu. Ma durat pagu poita, a pustis de seti minutus, su Casteddu cun Petagna agatat su paregiu. E aici acabbat sa parti de unu de sa partida. Si torrat a partiri cun Azzi chi pigat su postu de Augello, chi at sunfriu meda a Orsolini. Su Bologna poderat sa bocia ma non ce dda fait a sfundai su muru de sa difesa de su Casteddu. Candu pariat chi is emilianus podessint segnai de un’ora a s’atra est invecias su Casteddu a fairi gol. Wieteska ponit una bocia in s’area pitica, dda tocat unu pagu PEtagna, ma est Calafiori chi ce dda ponit in sa porta de Skorupski. Po s’orrestu de sa partida su Bologna cicat de dda paregiai, ma cun atentzioni manna is piciocus de Ranieri ce dda faint a dda portai a domu, custa vitoria chi est de oru.
A s’acabbu de sa partida s’allenadori Ranieri at fueddau cun is giornalistas: “Is tifosus ant cicau fidi in mei giai de ocannu passau. Ddu naraia finas trintacuatru annus a immoi ca podiaus torrai a biviri e ddu torru a nai finas oi”. Ranieri at torrau gratzias a totu is tifosus po s’agiudu chi ant donau a sa scuadra.
Cun custus tres puntus su Casteddu si stesiat de s’Empoli e de sa Salernitana, si lassat a is palas finas su Verona e si ponit a su costau de s’Udinese cun dixiotu puntus. Ma sa conca de Ranieri est giai a sa partidade dominigu chi lompit in Frosinone. Chi si bincit su campionau podit mudai.
Màuru Mura
Lunis, su cuindixi de gennargiu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.youtube.com/watch?v=PjtaonZCczA
