“Paris a mei c’est pobidda mia, sa familia mia, totu seus addolorius. Ia bolli pensai a s’ortu miu in Sardigna e invecias…”. Invecias depit pensai a sa figlia, serrada in presoni in Ungheria de treixi mesis, at acabbau de fairi s’arti sua, s’ingegneri, e s’est agatau a fairi s’ativista po is diritus de s’omini po binticuatr’oras a sa dì. Issu est Robertu Salis, casteddaiu, babbu de Ilaria, sa maistedda incurpada de airi scutu dus nazistas in Budapest. S’impresonamentu de Ilaria at fatu chistionai meda po sa manera chi est custrinta a biviri. Is imaginis cun is cadenas a is manus e a is peis ant fatu su giru de su mundu.

Imoi po Ilaria est lompia sa candidadura a is Europeas de làmpadas cun “Alleanza Verdi e Sinistra”. Ma su babbu non bolit chistionai de politiga. Contat de sa figlia: “sa manera de sa comenti est impresonada est migliorada unu pagu”, narat Roberto Salis in dd’unu atobiu in Napoli, “Ilaria giai istat beni, est una femina forti meda, finas chi at biviu unu tempus tostau, massimamenti is primas trintacincu dis de presoni funt stetias dificilis. Nosu non sciaus cussu chi fut passendu e po unu babu est una cosa legia. Immoi istat meglius. S’urtima bia ddi eus mandau finas unu fon po si sciutai is pilus e, apustis catodixi mesis si ddus at possius sciutai”.

Salis contat de sa candidadura de Ilaria “unu contu dificili, giai ca cun Ilaria ce dda facu a chistionai feti po dexi minutus a sa dì”. Fueddat de su presidenti Mattarella e ddi torrat gratzias po sa disponibilidadi chi at amostau.

In medas, amitit Robertu Salis, dd’ant “serrau sa janna in carigas” e non si ndi fait un’arregioni che s’Italia non “ce dda facat a fairi sighiri sa Costitutzioni in atras natzionis. Nosu teneus s’articulu 3 chi narat chi dogna italianu depint essiri trataus a sa matessi manera indenanti de sa lei, non si narat in cali Stadu. Chini at scritu sa Costitutzioni, fut unu pagheddu prus sabiu de is politigus chi s’agatant oi”.

 

 

 

Màuru Mura

 

 

 

Dominigu, su bintunu de arbili de su 2024

 

 

Attività realizzata col contributo della Regione Sardegna – Imprentas 2023-2024. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.milanotoday.it/cronaca/roberto-salis-lettera.html