De seguru no est una noa manna, ma a si ddu intendiri nai, massimamenti de is strangius chi trabbagliant in su turismu, fait prageri. E aici, galu una borta ancora, sa Sardigna est sempiri in su coru po mari e spiagias. Sa nova est cussa chi ocannu is spiagias sardas no ant cuasi lassau tretu a is atras de s’orrestu de s’Italia. Difatis intru de is cincuanta meglis nd’agataus trintanoi chi s’agatant in s’Isula. Ddas at postas in filera sa piataredda de cica de domus po is vacantzas Holidu, chi at umperau is numurus de Google Maps po fairi una classifica de is spiagias prus cicadas in Italia. Nd’est, aici, beniu a campu ca sa sa Sardigna est sa meri manna, pighendusi prus de tres partis, in pissu de cuatru e prus che a totu ca is primas doxi positzionis funt totu sardas. Sighint, ma stesiadas de meda, atras regionis: Puglia, Toscana e Liguria.
Sa de unu, prus cicada, est sa spiagia de Scivu, unu de is tretus prus spantosus de sa Costa Birdi, in su sartu de Arbus, bidda de su Campidanu de Mesu. Sighit sa spiagia de Is Arutas, posta in sa penisola de su Sinis, famada po s’arena de prederba fini meda e in prus de unu colori. Agataus, dapoi, Porto Giunco, in is orus de Crabonaxa, acanta de is mangonis de colori orrosa chi bivint su stainu de Notteri. Cuarta positzioni po sa spiagia de su Giudeu, in Chia, cun arena in colori de oru, montigeddus de arena chi dda ingiriant e abba aunia si ddue podit sprigai. Is primus cincu positzionis acabbant cun Mari Pintau, in su Gulfu de Casteddu: abbas de un’asulu aici forti chi non si connoscit in atrus logus.
Is atras cincu, de is primas dexi, funt sa spagia de is Dunas, in Porto Pino, Mari Ermi in sa penisola de su Sinis, Piscinas, sa spiagia de Rena Bianca, in Santa Teresa de Gaddura e serrat custa classifica sa spiagia de Cala Spinosa in Capo Testa.
Màuru Mura
Martis su ses de austu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.comunearbus.it/it/amministrazione/luoghi/luogo/Spiaggia-di-Scivu/
