Is tifosus sardus non bint s’ora chi lompat sabudu ca at essi sa prima partida in domu de su Casteddu. Allirgus meda po sa torrada de Claudiu Ranieri, s’allenadori romanu chi torrat in s’Isula a pustis prus de trint’annus. Ranieri iat acumpangiau, cun sabientzia e allirghia, su Casteddu de sa serie C a sa serie A. Fut su Casteddu de is fradis Orrù, fut una scuadra giovana chi iat spantau po comenti giogaiat e po sa gana. Bosi ddus arregodais is giogadoris? In porta Ielpo, in difesa, de drestra a manca, Festa, Valentini, Firicano e Poli; in mesu de campu, sempiri de drestra a manca, Cappioli, Pulga, De Paola, Bernardini; indenanti Provitali e Paolinu. Custus funt cussus bessius de sa Serie B a sa serie A. In segus lompiant in Casteddu giogadoris mannus, arregodaus de totus, massimamenti Matteoli, Francescoli, Fonseca e Herrera. Su cumentzu de sa serie A non fut stetiu de is prus bellus, ma dapoi, de su mesi de idas de su noranta, cun giogu e barra, Ranieri, at sarvau su Casteddu. Arregodus bellus po totu is tifosus chi ant biviu cussus annus. Est po custu chi immoi s’aspetant meda: Giulini at fatu su sù, custu est seguru.

At a bastai Ranieri po giumpai totu is scuadras chi tenit a innantis e cicai de torrai in Serie A? A parrer nostu est feti sa prima perda, poita in campu calanti s giogadoris e iat serbiri a ndi portai fortis.

Su primu chi at a erribai est su laterali de su Modena Azzi. Su Casteddu, de curtza, at bintu sa cuntierra cun atras scuadras, po ddu comporai, massimamenti su Palermo ca ddue postu is ogus de a innantis. S’acordiu cun su Modena ddue est e fintzas cun su giogadori: unu milioni a is emilanus e Azzi at a abarrai in Casteddu fintzas a su 2025.

In su mentris, in Asseminello, sa scadra s’est torrada a allenai: a un’ala is giogadoris Di Pardo, Mancosu e Rog, chi, cuasi de seguru, no ant a giogai sabudu.

 

 

 

Màuru Mura

 

 

Martis, su dexi de gennargiu de su 2023

 

 

Foto: https://www.fanpage.it/sport/calcio/claudio-ranieri-torna-ad-allenare-ha-detto-si-al-cagliari-e-realizza-subito-un-record-clamoroso/