“Deu soi trancuilla, babbai fut su de otu figliu de una familia de massajus. Oi non s’agatat, sighit a mi mancai, ma m’at imparau duas cosas: chi non fais mali non timas, chi non furas non ti depis atacai. Soi trancuilla, torru a nai, mi dispragit feti de mama, poita sunfru po figliu miu ca non podit cumprendiri”. Aici sa ministra de su Turismu Taniela Santanchè, chistionat de s’inchiesta de Report e de is atividadis imprenditorialis de is aziendas suas, massimamenti cussas de Visibilia e Ki Group.
Sa puntada de Report at fatu bessiri a campu cuntierras politigas e fueddus tostaus de parti de su centrumanca. Su Partidu Democratigu, cun su senadori Antoni Misiani, at pediu contus a sa premier Giorgia Meloni e a is ministrus Calderone e Urso. Bolit sciri “comenti bolit fairi su Guvernu po acrariri is faddinas de sa ministra Santanchè. Ca custus modus de fairi non funt dignius de s’onori chi iat depiri tenni unu ministru de sa Republica”.
Po cussu chi at amostau Report, e po cussu chi si ligit in calencunu giornalis, de su 2018, ora aunia sa Santanchè cun Mazzaro, chi fut su cumpangiu de vida e de afaris, funt imbucaus a su cumandu de sa sociedadi Ki Group, cust’urtima at cumentzau a tenni dificoltadis in su pagai e at artziau is depidis finas a otu milionis de euruc, cuasi unu cuartu de totu su faturau, duncas cun bilancius in orrubiu, trabagliadoris mandaus a domu insoru chena licuidatzioni e aziendas postas in dificoltadi manna. Po mori de custu, su valori de sa Ki Group est passau de trintacincu milionis a 465.000 eurus. E in su mentris chi is atzionistas ant postu bintitres milionis de eurus, sa ministra at erriciu dus milionis e mesu po is carrigas socialis e Canio Mazzaro invecias ses milionis.
Ma non feti. De is documentus arresurtat ca sa Ministra at pigau agiudus de su Stadu finas po sa pesta de su Covid-19.
Po totu custu is democratigus pedint de acrariri totu in aula. E in sa magiorantzia puru sa Lega bolit acrariri: “Sa ministra Santanché at nau de essiri trancuilla, at nau ca candu at a lompiri s’ora at a benni in Parlamentu a spiegai is arregionis suas. Duncas aspetaus custas arregionis, finat poita is processus non si faint in sa televisioni cun is indagus de is giornalistas”, at nau su caputruma in sa Camera Ricardu Molinari.
Est intervennia finas sa Meloni: “Deu pensu chi non ci siat perunu problema de chistionai in Parlamentu. Soi cuntenta chi sa ministra apat donau sa disponibilidadi. Dd’apu intendia trancuilla e tancuilla soi deu puru”
Màuru Mura
Lunis, su bintises de làmpadas de su 2023
Foto: https://www.ansa.it/sito/notizie/politica/2023/06/24/santanche-se-sara-chiesto-saro-fiera-di-riferire-in-aula_86b74422-b072-48b6-ac2d-b6cd4a47d0e4.html
