“Una tigri impresonada”, “Unu mostru posta in prima pagina”, “Interrada bia”, cun su sport comenti “de su solu passai su tempus, poita, a dolumannu, non tengiu mancu unu libru”, e “dus fueddus naraus a su colombu chi si incrarat a foras de sa fentana”.
Ilaria Salis, sa maista de arreiginis sardas acapiada in Budapest s’undigi de friargiu de ocannu passau, incurpada de airi scutu estremistas de destra, contat is primas duas cidas de presonia in dd’unu diariu de su cali Repubblica at publicau calencunu orrogu.
“Gyorskocsi Utca. Cella 615, cumentzu de su mesi de marzu de su 2023. De cussu chi possu castiai mi parit de biri una catedrali. Dapoi ap’a scoberriri ca invecias est su Parlamentu. De s’orrestu non connosciu nudda de Budapest, ca a pustis de una pariga de oras chi soi lompia, m’ant inderetura acapiada”, scrit Ilaria. “S’ora de passai in s’obertu est su tempus solu aunia biu calencun’atra presonera. Cun calencuna de custas ce dda facu a chistionai in limbas chi connosceus. Is atras mi castiant de tesu comenti chi chi fessi unu spantu. Forsis po is stivalis stranus chi tengiu a is peis, forsis poita is giornalis de su logu m’ant mudau in dd’unu mostru e soi connota de a innantis comenti ‘s’orrovina de is nazistas’, o forsis poita, in manera prus facili, soi una strangai”, sighit sa maista chi aspetat “cun passientzia paga is relatas cun sa genti mia in Italia”.
Su noi de martzu de su 2023 e sa “dì de bintises de presonia”. “Allirghia E.T. TELEFUNU DOMU”, narat Ilaria in su diariu chi, fut ora, arrennescit a intendiri sa familia: “Fueddai in sa limba mia, intendiri is bogis de sa genti chi mi bolit beni e s’acostiamentu insoru scadenat in mei emotzionis mannas”. Su degi de martzu, sempiri de su 2023 di “nant ca s’acapiamentu miu sighit”. In segus erricit sa noa ca is cuntatus sus “funt vietaus, frimaus po cumandu de sa Procura Generali de Budapest capitali. Totus. Non possu fueddai nemancu cun mama mia. Mi intendu interrada bia”.
Màuru Mura
Cenarba, su primu de martzu de su 2024
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://partitodemocratico.it/gli-eurodeputati-a-tajani-ilaria-salis-va-riportata-in-italia/
