S’abogau contras de su fascismu Giorgiu Mastino Del Rio, deputau in Parlamentu, po duas bias de su 1948 a su 1958, est stetiu arregodau in Ballao, sa bidda de su Ferrei aunia fut nasciu in su 1899. Mastino Del Rio si fut laureau in Casteddu in su 1921 e dapoi si ndi fut andau in Roma aunia iat fatu su professori. Catolicu, in su 1924 fut imbucau in su Partidu Popolari, pesau in su 1919 de Don Luigi Sturzo.
Intru de is bint’annus de fascismu at tentu una parti in sa Resistenza. Paris a atus abogaus nd’iat pesau unu comitau, fendu totu a sa cua contras de su poderi de Mussolini, e difendiat chena pigai dinari in is Tribunalis. De su mesi de cabidanni de su 1943 at atacau, in domu sua, prus de unu chi andaiat contras de is fascistas, aici sarvendudeddus de s’impresonamentu. In su 1944 sa politzia tedesca de sa Gestapo ddu iat acapiau, ca si creiat ca tenissit relatas cun Emiliu Lussu e atrus omnis de sa Resistenza. Torturau in su presoni romanu de s’orruga Tasso no iat mai traigiu. Po cust’arregioni, a s’acabbu de sa guerra dd’ant intregau una medaglia de prata po balentzia militari.
Eris mengianu, in s’aposentu de is atobius de “Dosa” funt stetius presentaus is paperis de su cunvegnu de su 25 de arbili de su 2022 e su libru, torrau a imprentai, de Giorgiu Mastino Del Rio “Ho invocato un morto”, bessiu in su 1948, aunia s’abogau contat cussu chi ddi fut sussediu, intru de acapiu, impresonamentu e torturas de is tedescus.
A pustis s’arregodu est cumentzada sa cerimonia de intregamentu de un’orruga po s’abogau chi est andau contra su fascismu, in su mentris chi sa biblioteca at obertu s’aposentu aunia s’agatant migliaias de librus arregalaus a su Cumunu de s’areu de Mastino Del Rio.
Intru de is atrus a s’atobiu s’agataiant finas Paulu Manoni, de sa biblioteca digitali vaticana, Munsinnori Marcu Lai, diretori de sa Caritas de Casteddu e is nebodis de Mastino Del Rio.
Màuru Mura
Cenarba, su bintises de arbili de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.ibs.it/libri-vintage/biografie