Ddue funt totus in sa cresia de Santu Carrulu de Borromeu po acumpangiai a Francu, Conca de bagna, Nieddu. Ddue fut Efisiu, ca boliat nai ma si poderaiat is fueddus intru de issu. Ddue fut Arremundu, chi chistionaiat cun is ogus prenus de lambrigas. Ddue fut Paulu, cun is matessis ogus infustus. Demetriu non castiaiat a nemus. Abbasciaiat sa mirada e prangiat finas issu. E Checco non podiat mancai. Finas issu in tristura. Su meri de Grafiche Ghiani, aunia Francu, Conca de bagna, trabbagliaiat, si biat de tesu ca fut cun su coru in pena. E aici pobidda sua. E Paulu Melis, meri de Bresca Dorada, lompiu de a tesu e totu, su matessi. E Francisca cun Roberta.

A una parti de sa cresia Tamara, chi castiaiat e non cumprendiat cussu chi fut sussedendi.

Funt lompius totus is amigus de Francu, Conca de bagna, a ddu saludai. E ddue fustis nosu puru, cun Fabiu in sa filera de unu. E chini scrit fut stesiau, ma castiaiat cun is ogus prenus de lambrigas e coru in pena. Comenti cussus de Paulu e de Arremundu. Chini at connotu a Francu, Conca de bagna, non podiat mancai. Francu in s’arti sua, de graficu, fut spantosu. Unu maistu. Aici ddu at arregodau finas su predi chi at fueddau. E arratza de fueddus chi at umperau cussu preideddu. Tui, Francu Conca de bagna, chi ias possiu ti ndi fus pesau a ddi as airi nau ca no fut aici. Ca fus unu barrosu meda e chini ti naraiat “A”, po tui fut “B”. E a s’imbessi, sa matessi cosa. Barrosu che pagus Francu, Conca de bagna, ma allirgu, onestu e de bonu sentidus. Ti ndi ses andau, sonumancu mi pragit a ddu pensai, sighendu s’arresurtau de is urtimas eletzonis regonalis. Setziu. A sa sola. Unu corpu ebbia.  Cun is pensadas tuas. E cantu ias airi segau is ancas sa dì in fatu. Chi iat bintu Truzzu tui fus cun sa Todde e, de seguru, ca at bintu sa Todde, tui fus cun Truzzu. Ca fus aici, amigu caru de Làcanas e massimamenti de Fabiu: unu segamentu de ancas fus Franco, Conca de bagna. Ma a ti bolli beni, a pustis dus minutus fut giustu. Ca fus bonu e tenias sempiri s’errisigeddu in is lavaras.

Sa terra ti siat lebia e passientzias a sa familia.

 

Màuru Mura

 

Giobia, su bintinoi de friargiu de su 2024

 

Attività realizzata col contributo della Regione Sardegna – Imprentas 2023-2024.

Legge Regionale 22/2018

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018