A is dexi de merì de eris ant serrau s’imbucu a su stadiu Unipol Domus aunia si podiat saludai su baulu de Gigi Riva. Genti meda est acodia. Su imbucu de unu fut po sa genti de sa familia e po totu sa scuadra de su Casateddu, ghiada de su presidenti Tomasu Giulini e de s’allenadori Claudiu Ranieri. In segus sa genti chi at fatu sa fila a sa citia.
A is seti de custu mengianu, finas a sa una, si podit torrai a saludai su campioni de fubalu, ma massimamenti s’omini. A is cuatru de pusti prangiu sa missa in sa Basilica de Bonaria celebrada de s’arcipiscamu de Casteddu, e segretariu de sa Cei, Giusepu Baturi.
“Dificili meda agatai is fueddus – at nau Lionardu Pavoletti – eus perdiu s’atacanti prus forti de dogna tempus. Totu sa genti at a bolliri sempiri beni a Gigi Riva”. “Riva at acapiau totu is sardus, ddu at fatu po annus medas, de a ainnantis de su scudetu finas a immoi. Sa spera est chi ddu facat finas in su benidori. Acabbat s’omini ma nascit sa legenda. Nosu ddi eus intregai su stadiu”, narat Giulini.
Su sindigu casteddaiu Pàulu Truzzu at declarau duas dis de lutu po sa citadi e unu minutu a sa citia ddu at intregau su Consigliu Regionali.
In s’aposentu de is mortus de su spidali Brotzu, aunia est mortu Riva, giai de mengianeddu funt lompius is cumpangius de su scudetu de su 1970: su difensori Giusepu Tomasini, su portieri Adrainu Reginato e su numuru dexi Ricciotti Greatti. Cun issus finas su portieri Arrenatu Copparoni e Gigi Piras, chi cun Riva ant giogau a pustis de su scudetu famau.
A s’interru ant a lompiri su ministru po su Sport e is giovunus, Andria Abodi, su presidenti de su Coni, Giuanni Malago, e de sa Figc, Grabieli Gravina, s’allenadori de s’Italia Lucianu Spalletti e atrus giogadoris de s’Italia chi at bintu is mondialis de su 2006. At a lompiri in Casteddu finas una delegatzioni de s’aministratzioni comunali de Leggiuno, sa bidda aunia est nasciu Giggirriva.
Màuru Mura
Mercuris, su binticuatru de gennargiu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.youtube.com/watch?v=D7IkHNWRQ1E
