Un’atra partida torrada a pigai po is pilus candu fut spacendusì, ma, prus che a totu una reatzioni forti a s’acabbu. Po Claudiu Ranieri, su puntu pigau oi contras de su Napoli tenit valentzia manna: “Is piciocus ant donau crobba e ant giogau cun conca e gana”, is fueddus chi at nau a pustis sa partida. “Connosciaus sa fortza de su Napoli e sciaus ca est una scuadra manna, ma non ddus boliaus fairi partiri in velocidadi e po totu sa prima parti de partida ce dda eus fata. In sa parti de dus eus faddiu candu ant fatu gol. In segus sa fortuna nos at agiudau e donau fortza po fairi su gol chi balit unu puntu de oru”.

Ranieri, dapoi, chistionat de s’atzioni de su gol de Luvumbo: “Est stetiu bravu Dossena a tirai sa bocia a innantis e bravu Luvumbo a cicai sa bocia e agatai su gol. Su puntu ddu eus pigau cun miniscimentu”. Est a nai finas ca su puntu permitit a su Casteddu – a pustis tempus meda – de agatai calencuna de bonu contras de una scuadra manna e donat spera e fidi po is partidas benientis, sa de unu cussa cun s’Empoli de dominigu chi lompit. “Immoi erribant partidas de importu mannu po is scuadras chi funt gherrendu a coa de sa classifica. Fut de importu a cumprendiri ca nosu podeus gherrai e ci eus a provai finas a s’acabbu. Is seus eus a biri eita podit sussediri: is numurus funt fridus ma scovviant sempiri sa beridadi. Scieus beni ca seus cun s’abba in is gangas, ma feti gherrendu podeus nai sa nostra”.

Ranieri torrat finas a chistionai de cussu chi est sussediu a pustis de sa partida perdia cun sa Latzio. “Castiai, fui cunvintu de donai is dimissionis a su 99’99%. Is piciocus m’ant arregodau ca comenti fustis bessius totu paris in Serie A aici cepiaus gherrai finas a s’acabbu. Non mi fut mai sussediu, in annus medas de fubalu, de agatai una scuadra intrea a nai a s’allenadori de non si nd’andai”.

In pissu de is problemas de sa scuadra, s’allenadori romanu tenit una pensa da totu sua: “Custus piciocus ant sunfriu candu funt calaus in serie B dus annus a immoi, non si dd’ant scarescia. Deu apu feti nau ca tocat a dda ponni a un’ala poita giogau po totu un’isula e is tifosus non si lassant mai a sa sola”.

 

 

 

Màuru Mura

 

 

Dominigu, su binticincu de friargiu de su 2024

 

 

Attività realizzata col contributo della Regione Sardegna – Imprentas 2023-2024.

Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.youtube.com/watch?v=dS3JmgcgSOo