Fut ora. Ma a innantis o a pustis depiat sussediri. Su Casteddu, e torraus a nai fut ora, at bintu sa primu partida in foras de domu sua. Forsis cussa prus legia de is atras giogadas, ma in dd’unu campionau aici longu c’at finas abbisongiu de partidas comenti de custas. Giogada cun su gorteddu intru de is dentis chena castiai tropu sa manera de lompiri a su gol. Ma a ddue lompiri in calechisiat manera.
Non fut facili sa partida cun s’Empoli po paricias arregionis. Sa de unu est ca de candu est erribau Nicola a su postu de Andreazzoli, galu non iant perdiu. Sa de duas est ca issus giogaiant in domu insoru e in Empoli no est mai stetiu facili a ddue binciri. Ma su Casteddu tenit un’omini sabiu setziu in panchina. Unu de cussus chi de fubalu ndi massiant e chi est arrennesciu a ponni in conca a is giogadoris sus una pensada: “Depeus gherrai”. E is piciocus, bestius de orrubiu e de asulu, cicant in dogna manera de ponni in campu is cumandus de s’allenadori romanu. Calencuna bia non ce dda faint poita tocat a fairi sempiri is contus cun is atras scuadras. Calencun’atra bia non ce dda podint fairi ca non funt campionis chena difetu. Funt piciocus, ma ant sempiri cumbatiu. Fencu faddinas puru, est a nai. Ma. de su campu ndi funt sempiri bessius cun sa magligedda infusta.
Immoi no at essi totu in calada, ma custus tres puntus pinnigaus in Toscana faint artziai su Casteddu prus a sus. Cun is matessis puntus de su Verona, chi est sa scuadra chi spantat de prus, e cun a palas su Sassuolo e sa Salernitana. In denanti, feti a unu puntu de distantzia su Frosinone e s’Udinese, pagu pagu prus stesiaus Empoli e Lecce. Si boliat una spusta de su Casteddu po cumprendiri chi podessit gherrai a sa pari cun is atras scuadraas. Intru de is partidas cun su Napoli e cun s’Empoli, sa spusta est lompia. A innantis.
Màuru Mura
Dominigu, su tres de martzu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.youtube.com/watch?v=n7U-h_rT4vo
