Su Casteddu perdit una partida de importu in Frosisone chi si stesiat de sa zona caglienti de sa classifica. Pariat andendu beni e difatis si bisaiant is primus tres puntus foras de domu candu Sulemana at fatu su gol de su Casteddu. Invecias, in sa parti de dus, su Frosinone cun tres gol de Mazzitelli, Soulé e Kaio Jorge, unu prus bellu de s’atru est a nai, at bintu sa partida. A s’acabbu de sa cuntierra in terra ciociara s’allenadori Claudiu Ranieri at chistionau cun is giornalistas: “Su Frosinone at minesciu de binciri”, est cussu chi narat Ranieri, a pustis sa parti de dus de sa partida aunia su Casteddu at sprecau su gol de vantagiu cun su cali fut andau in is spogliatuius de su “Stirpe”. “Lastima. Est stetiu unu tempus po unu: in sa parti de unu su Frosinone fuliaiat sa bocia in s’area nosta e in sa parti de duas, invecias, ant mudau giogu, ponendu unu giogadori de mesu campu indenanti de sa difesa nosta. Eus fatu totu cussu chi depiaus fairi, ma, a dolumannu, non ce dda eus prus fata a ddis ponni problemas”. In pissu de is scioberus “taticus”: “Petagna depiat poderai sa bocia, ma is centrucampistas nostus ddu depiant agiudai. Forsis ant cumprendiu ca fustis sunfrendu e ant pensau ca non serbiat a ddus andai a ddus aspetai: ddu apa fueddai in custa cida”.
In sa partida cun su Frosinone de su mesi de Sant’Andria passau, su Casteddu ce dda iat fata a binciri a pustis essiri a suta po 0-3, immoi, invecias, una partida legia de averas chi arriolat, ma non prus de tantis: “Chi iaus bintu fustis abarraus cun is peis beni prantaus in terra e finas perdendu feus su matessi. Non seus allirgus po nudda, ia pediu de cicai de non ddus fairi segnai, ca nosu unu ddu ias airi fatu. Eus perdiu e non eus pigau puntus, ma ddu scieus giai de meda ca depiaus gherrai finas a s’urtimu po nosi sarva: custu giai ddu teneus in conca de su cumentzu de su campionau”.
Màuru Mura
Lunis, su bintidus de gennargiu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.youtube.com/watch?v=EsSjP9xH-hs
