No est sa scuadra chi finas a immoi at spantau a totus, ma sa Torres bincit su derby de tres de ocannu. In su “Vanni Sanna”, prenu de 4.700 personis sa Torres bincit po 1-0 cun s’Olbia e sighit a castiai de acanta su Cesena e lassat a sa matessi distantzia su Perugia. Po is gadduresus est sa partida de ses chi perdint de sighiu, finas chi tocat a nai ca in sa parti de dus ant provau cun totu is fortzas chi tenint a torrai a ponni sa partida in paridadi. Su problema mannu de s’Olbia est de averas ca non ce dda fait a fairi gol. Su cumentzu de sa partida est totu po sa scuadra sassaresa chi giai a su minutu de ses cun Scotto erriscat de fairi gol. S’Olbia ndi bessit beni, a pustis atru cincu minutus, e Bianu pigat sa bocia in sa metadi campu e currit bia sa porta de Zaccagno, ma sa bocia e totu si perdit a unu metru de su palu. Passant atru cincu minutus e sa Torres, sempiri cun Scotto, andata canta a su gol, ma su portieri no est de acordiu. Fischnaller erriscat de segnai a su minutu de dixiannoi. Ma si fait perdonai in s’atzioni benienti candu de conca ponti sa bocia a palas de su portieri de s’Olbia. Ancora nemus ddu scit ma at essi su gol chi decidit sa partida. Sa partida sighit sempiri cun sa Torres chi cumandat e s’acostiat a su gol de dus.
Dominigu chi benit sa Torres, chi contat giai cincuanta puntus in classifica, at andai a giogai in Toscana cun sa Carrarese e s’Olbia, chi est a dixiaseti puntus, si dd’at a biri cun s’Arezzo. Est a nai ca sa Torres est fendu de averas unu campionau de spantu e at a sighiri a bisai, in su mentris ca s’Olbia est penendu ca in palas tenit feti una scuadra, sa Fermana, e cussas indenanti funt giai stesiadas, ma chi non si cumentzat a binciri no est chi mudit meda. At a serbiri prus fortza e prus barra, ca ancora si podint cuberai puntus.
Màuru Mura
Dominigu, su bintunu de gennargiu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.youtube.com/watch?v=4bGWzvoFFtM
