Su Casteddu bincit 2-1 cun s’Atalanta e agatat tres puntus chi balint oru po sa cursa chi est fendu de su cumentzu de su campionau po si sarvai de su calamentu in Serie B. Una vitoria chi fait allirgia meda Ranieri: “Est stetia una partida bella meda e spantosa”, narat. “Fut cumentzada mali, sciaus ca s’Atalanta iat essi partia a forti, ma depiaus reagiri e cicai de arrespundiri atzioni po atzioni. No eus lassau a perdiri, eus cumprendiu comenti depiaus giogai e a pustis ddu eus fatu in manera galana de averas. Is piciocus ce dd’ant fata a alluiri sa genti chi ddus at animaus finas a s’acabbu: est una partida binta de sa scuadra e de is tifosus”. Chi mudat meda sa classifica, in dd’una giornada aunia medas scuadras de sa parti bascia ant fatu puntus. “Est unu passu de importu, ma chi ancora non si portat a sa seguresa. Custa partida nos amostat, un’atra bia de prus, ca gioghendu cun gana e barra in dogna bocia, podeus fairi cosas mannas”.
A su Casteddu serbiant tres puntus contras de una scuadra intru de is prus fortis, ca de candu est cumentzau su campionau est sussediu bortas pagas. “Ma immoi est giai tempus de ponni a un’ana custa partida e sighiri a spingiri”, avertit Ranieri. Chi at agatau armas mannas, fendudendus imbucai intru de sa partida, comenti de Luvumbo e Viola. “Po nosi sarvai depeus pigai in cunsideru custa truma de giogadoris, chi s’est postu comenti de unu buciconi in cussu tempus aunia fustis urtimus e pariat totu perdiu. Custus piciocus si funt agiudaus sempiri, s’unu cun s’atru, nemus s’est disisperau candu est andau a si setziri in panchina e immoi seus feti boddendu cussu chi eus semenau. Teneus piciocus chi si funt cumpartzius is gol intru de issus. Mi parit ca seus sa scuadra de dus cun prus gol fatus de chini est imbucau. Custu bolit nai feti una cosa: chini non giogat de su cumentzu scit beni ca podit essiri decisivu su matessi”.
Màuru Mura
Lunis, s’otu de arbili de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.calciomercato.com/news/cagliari-ranieri-dobbiamo-cancellare-questa-vittoria-e-guardare–77687
