Sa giustissia est cichendu de donai unu nomini a is orrestus de unu corpus de femina bessiu a campu in d’unu parcu de sa capitali italiana, in su Pigneto in s’orruga intregada a Etore de Fieramosca.
De cussu chi si connoscit iat podit essiri Andreea Rabciuc, una femina de bintot’annus sparessia in su sartu de Montecarotto, in sa provincia de Ancona, su doxi de martzu de ocannu passau, a pustis airi certau cun su sposu.
Su corpus nd’est bessiu a campu e bogau a sus de unu escavadori intru de mesu de unu trabagliu de pulitzia de unu terrenu chi est de is Ferrovias de su Stadu. Fut a intru de unu canali. Su dotori legali, de una prima mirada, at nau ca podit essiri una femina, de prus o mancu trint’annus, chi est morta non de prus de un’annu a immoi. In su su sugu teniat una collana pitichedda. Totu particolaris chi podint agiudai is indagadoris a donai unu nomini.
Po su sparessimentu de sa picioca po s’ora si tenit feti un’incurpau, su sposu Simoni Gresti, chi po sa giustissia, tenit sa curpa de secuestru e po bendiri droga. Est indagau ma in libertadi, ma su piciocu at sempiri nau de no airi fatu nudda.
Sa picioca fut sparessia a pustis unu merì passau in d’una roulotte, cun Simoni e atrus dus amigus, in d’unu terrenu in su sartu de Montecarotto. In s’arveschida de su doxi de martzu de ocannu passau iat airi certau cun su sposu e si fut posta a caminai, in cussa chi tzerriant sa “via Montecarottese” po torrai in Jesi a sa sola, lassendu su telefunu a su sposu. De tandu non s’est scipiu prus nudda. Mancu speru. Immoi una spera po is parentis de Andreea, sonumancu po dda prangiri in d’una tumba. Eus benni a biri eita nd’at a bessiri de su indagu.
Màuru Mura
Martis, su cuatru de triulas de su 2023
Foto: https://notizie.virgilio.it/i-resti-trovati-a-roma-appartengono-ad-andreea-rabciuc-la-procura-di-ancona-chiede-l-esame-del-dna-1575124
