De su corrunconi prus ocidentali de s’Europa su Paba castiat su continenti “prus beciu” comenti issu e totu ddu tzerriat, e pedit de mudai “is pensadas”. Su mundu abisongiat de s’Europa, ma de un’Europa capassa de “fraigai pontis e pagi”, chi castit cun mirada noa a sa vida, poita ci funt medas “bartzolus sbuidus” e tropu “becius lassaus a sa sola”.
Funt custus is primus fueddus chi Paba Franciscu at nau in su viagiu in Portogallo. A pustis a chistionau de is scandalus chi “ponint in lugi mala sa Cresia”. E in su merì de eris, a s’acabu de is atobius istitutzionalis e cun su mundu de sa Cresia, Franciscu at erriciu, in sa Nuntziatura de Lisbona, una truma de trexi personis, vitimas de genti de cresia. Is trexi funt acumpangiaus de is rapresentatis de is istitutzionis de sa Cresia portoghesa, incarrigadas de agiudai is minoris.
“S’atobiu – faint sciri de su Vaticanu – est addurau po un’ra e Franciscu at ascurtau a totus”.
In Lisbona giovunus e bandelas de totu su mundu. Is piciocus, candu s’est amostau su Paba, ddu ant erriciu cun allirghia manna e batendu is manus. “Ap’a torrai prus giovunu”, at nau Franciscu pensenduru a custa Dì Mondiali de sa Gioventudi.
S’arriolu prus mannu abarrat cussu de sa guerra in Ucraina. Mancant “pensadas coragiosas de pagi” e su Paba pedit a s’Europa: “Aunia andas chi non donas caminus de pagi, pensadas po fairi acabbai sa guerra in Ucraina e a is atras guerras de totu s’orrestu de su mundu?”.
“Arriolat ateretanti candu si ligit chi in logus medas – at sighiu Franciscu in sa prima fueddada in su Centru Curturali de Belem – si ponint a curriri dinaris, sempiri de prus, po comporai armas, invecias de pensai a is figlius insorus. Deu bisu un’Europa, cori de s’ocidenti, chi pongiat a curriri pensadas e dinari po ndi smorri is guerras. Un’Europa chi pongiat in mesu populus e personis, chena atras teorias”.
Màuru Mura
Cenarba su cuatru de austu de su 2023
Foto: https://www.ministeroturismo.gov.it/dieci-anni-pontificato-santanche-papa-francesco-ha-affrontato-tante-sfide-ora-ci-aspetta-importante-appuntamento-con-il-giubileo/
