Una denuncia dd’ant giai presentada a i is carabbineris e atras nd’ant a erribai a intru de pagu tempus. Funt medissimas is feminas chi funt stetias turmentadas, su fini de cida passau in Rimini po s’atobiu de is Alpinus. E in medas funt prontas a denunciai contras non si scit chini.

“Non una di meno” su sotziu chi at arregortu e difundiu is bogis est giai trabaglliendu cun is abogaus. Unu contu chi fait fueddai, in su mentris chi passant is oras si pesant sempiri bogis noas. Sulidus, fueddus rozus, atentzionis non pedias, e calencunu at finas allonghiau is manus.

In su merì de s’atra dì una picioca de bintises annus s’est fata acumpangiai de un’amiga e s’abogau po contai cantu dd’est sussediu: sabudu a merì, at nau, dd’ant ingiriada e ofendia in tres, intru de mesu de totu sa genti chi si ddue agataiat. Dd’ant, po cussu chi narat issa, pigada po unu brassu, e nau fueddus malus de sessu, a innantis chi ce dd’at fata a si fuiri.

Chistionat de fatus gravis meda su ministru de sa Difesa Larentu Guerini, chi dominigu fut presenti a s’atobiu. “Certu tocat a essiri segurus de cussu chi est sussediu, ma non tocat mancu a si girai a s’atra parti. Chi de averas totu custas cosas funt sussedias andant a s’ambessi de su valori e de is ideas de is Alpinus. Non depeus fairi de totu un’erba unu fasciu, ma a su matessi tempus non si depint mancu serrai is ogus: sa violentzia non depit mai essiri giustificada e andand cundennada chena mancu ddue pensai”.

Is Alpinus torrant a palas totu is curpas: “Est craru chi ci funt denuncias e nosu, chi nosi narat caa funt beridadis eus pigai eus a nai sa nosta, ma po s’ora nemus chistionat de cosas seguras”, at nau su presidenti Bustianu Favero.

In d’unu documentu su sotziu donat sa curpa a is giovunus chi faint finta de essiri alpinus ponendusì su capeddu, finas chi gneti meda est pronta a giurai ca fut genti de una certa idadi.

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

 

Foto: https://www.repubblica.it/commenti/2022/05/10/news/molestie_alpini_rimini-348959702/