Scioberau comenti allenadori meglius de su mundu, in denanti a Guardiola e a su ct de su Marocco Walid Regragui, de sa federatzioni mondiali de is statisticus de su fubalu, Carrulu Ancelotti at fueddau in Riad aunia oi su Real Madrid s’at a giogai sa Supercopa spagnola cun su Valencia. Cuntierra chi si giogat in s’Arabia Saudita, ca is arabus bolint fairi cosas mannas po cicai de ndi pesai a campu su fubalu etotu. Finas cun sa partida de giobia 19 de gennargiu intru de su Paris SG contras de unu mesturu de su Al-Hilal e Al-Nassr. S’intentzioni de chimi aprontat cust’atobiu est cussu de un’atra cuntierra intru de Messi cun Cristiano Ronaldo, ma s’allenadori de su Al-Nassr, Rudi Garcia, at nau ca non podit garantiri sa presentzia de su portoghesu. Po s’allenadori francesu Ronaldo at a fairi sa prima partida dominigu 22. Eus a biri chi is organizadoris dd’ant a fairi mudai idea.
In su mentris at pigau su fueddu Ancelotti chi giogat custa partida contras su Valencia de Rino Gattuso, chi a is tempus de su Milan est stetiu unu giogadori suu. “Cun Gattuso eus biviu tempus bellus meda, eus bintu duas Champions League. A pustis is relates intru de nosu non sempiri est stetiu bellu poita eus tentu problemas, ma de custu non di bogliu chistionai”. E at aciuntu, in segus: “De cussu Milan chi apu allenau funt bessius a foras, in su tempus, allenadoris medas, dognunu cun d’una manera de allenai propria: Gattuso, Inzaghi, Nesta. Is scuadras de Gattuso funt barrosas medas, issu tenit un’identidadi crara”. Non si podiat non chistonai de un’atru giogadori chi at allenau, Cristiano Ronaldo: “Ronaldo cun Bale, chi s’est arretirau in custas dis de giogadori, funt stetias duas bandelas de su Real Madrid e deu ia bolli sempiri su meglius po custus dus”.
Gattuso at inderetura arrespustu a is fueddus de Ancelotti: “Carrulu connoscit beni sa stima chi tengiu po issu, comenti de omini e de allenadori. Is problemas intru de nosu fut stetiu feti po su trabagliu, ma po mei est unu de is allenadoris meglius de su mundu. Totu est sussediu candu Ancelotti allenaiat su Napoli. Deus oi lompiu a pustis de issu e is giornalis iant scritu ca sa scuadra fut mali posta fisicamenti. Su problema est nasciu tandu, ma deu tengiu arrespetu mannu po Carrulu”.
Màuru Mura
Mercuris, s’undixi de gennargiu de su 2023
Foto: https://www.ilnapolista.it/2023/01/ancelotti-con-gattuso-abbiamo-avuto-problemi-personali-e-non-voglio-parlarne/
