Is giogadoris de su Casteddu torrant a trabagliai in Asseminello, de fatu sa partida giogada, e binta po 2-1, cun is francesus de su Strasburgo. In campu po s’allenai ddue fut finas, po sa prima borta, Giuanniluca Lapadula, comporau po ponni fortza manna a s’atacu casteddaiu a pustis chi Joao Pedro at pigau su caminu de sa Turchia. In su trabagliu de eris, Liverani at dividiu is giogadoris in duas trumas: de una parti, in sa palestra, cussus chi ant giogau de prus sa partida, s’orrestu, invecias in campu cun tecnica e atletica a ddas fairi de meris.

At torrau a chistionai finas su presidenti Giulini: “Eus passau cidas dificilis, naraus puru ca no est chi nos apant atacau meda, po nai sa beridadi m’aspetaia de prus: tenni a su costau facis medas de amigus po mei est de importu mannu. Est a prima borta chi fueddu de fatu cussu dominigu maliditu de Venetzia. Naraus ca seus prontus a torrai a partiri”.

Custus is primus fueddus de su presidenti de su Casteddu, ca fut in Asseminello po donai su nomini de su babbu Carlo, a sa tribuna noa de su campu de sa scuadra de sa Primavera.

Fut de meda tempus chi si depiat fairi: “No dda eus possia fairi a innantis – at sighiu Giulini belle chi s’agibilidadi de su campu, fintzas chi fut pronta, est lompia feti su primu de triulas, de fatu de un’annu de mesu aunia fut totu prontu. Custu nosi fait pensai a cantu est dificili fraigai unu stadiu. Chi po una tribuna serbit un’annu e mesu, pensai po un’opera prus manna. Custa tribuna nascit poita creeus in sa Primavera e poita custu campu possat essiri umperau po is partidas. Spereus chi bengiat genti meda!”.

Su presidenti casteddaiu at serrau s’atobiu chistionenduru de su babbu e arregodendu sa storia sua in Sardigna in is annus Cincuanta de su seculu passau cun is primas minieras de fluoro in su Gerrei: “Est citadinu onorariu de Silius, at brullau Giulini, immoi ddu at essi finas de Asseminello”.

 

 

 

Màuru Mura

 

 

 

29 de triulas de su 2022

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22

 

Foto: https://twitter.com/tommasogiulini