Dominigu marigosu meda po is scuadras sardas de sa Serie C de fubalu. Perdint ambas, sa Torres foras de domu cun su Rimini e s’Olbia in domu sua cun sa Vis Pesaro. Po sa Torres est sa segunda bia chi sussedit in custu campionau. In Rimini is sassaresus perdint po 3-1, a pustis chi iant fatu su gol de su 0-1 cun Fishnaller. Ma in undixi minutus is riminesus faint tres gol e furriant sa partida. Comenti giai sussediu in sa partida contras de su Pesaro sa difesa sassaresa at lassau a disigliu meda e finas is mudamentus de s’allenadori funt lompius adduru in sa parti de dus, candu po prus de binti minutus ant giogau undixi contras de dexi, poita s’arbitru c’iat stupau a Morra de su Rimini.
A pustis chi po tres bias sa Torres iat tirau de su corrunconi de su campu at fatu gol cun Fischnaller. Dapoi de una pariga de minutus, sempiri cun Fischnaller, at erriscau de fairi un’atru gol, ma in segus cun Del Carro, Ubaldi e Morra de conca, su Rimini ndi fait tres de gol e sa partida si mudat in dd’una bessida manna.
Su Cesena, chi cumandaiat sa classifica, nd’est torrau cun dd’unu puntu de Ferrara e immoi s’agatat a tres puntus in prus de is piciocus de Greco. S’acostiat unu pagu de prus, ma sempiri a distantzia manna, su Pontedera chi at bintu po 4-0 cun sa Fermana.
S’Olbia, invecias, perdit sa partida contras de sa Vis Pesaro cun dd’unu gol de su giogadori nou Nicastro. Po is arvus gadduresus est sa partida de cincu perdia de sighiu, e in classifica abarrat feti a innnatis de sa Fermana.
Immoi, po s’una e s’atra scuadra, dominigu chi benit lompit sa partida chi podit serbiri po pigai non feti tres puntus, ma finas animu e coragiu, difatis a is cuatru de merì s’at a giogai, in Tatari, su derby, intru de is duas. Castiendu sa classifica parit de non ddu essiri partida, ma su derby abarrat sempiri su derby.
Màuru Mura
Dominigu, su catodixi de gennargiu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.youtube.com/watch?v=LZ4qXjgAXCg
