De su cuindixi de su mesi ch’intrat po intrai in is logus de trabagliu, pubricus e privaus, tocat a tenni su Green pass. Aici at decidiu su Consigliu de is ministrus. Su documentu de su guvernu narat ca sa paga non si pigat de sa primu dì, po totus is trabagliadoris, chi non ddu tenint. In s’aministratzioni pubrica chini non tenit su Green pass non podit tenni peruna giustificatzioni e a pustis cincu dis su trabagliu abarrat suspendiu. In logu chi non siat pubricu, invecias, su trabagliadori non depit pigai dinari finas a candu non amostat su paperi birdi. Po cussus chi non si podint vacinai poita tenint atras maladias totu custu non balit.

In su fratempus in Sardigna funt pagu prus de centu is impestaus nous de su Covid 19, calat su numuru de chini s’agatat in is aposentus de is spidalis, ma, a dolu mannu, funt cincu is mortus: tres ominis de sessantases, otantatres e otantanoi annus e una femina de otantacincu chi biviant in sa citadi metropolitana de Casteddu e un’omini de sessantanoi annus chi biviat in sa Provincia de su Sud Sardigna.

Nova bona est ca torrat a calai sa percentuali de chini est in terapia intensiva: a pustis cidas meda imoi est a su 10%. Calat sa percentuali finas in atras regionis italianas: sa Calabria est a s’8%, sa Liguria a su 3%, sa provincai de3 Bolzano a su 6%, s’Umbria a su 7%. Abarrat frima in is Marche a su 13% e in Sicilia a s’11%.

In Sardigna, duncas, funt bintunu cussus a intru de is terapias intensiva, est a nai tres de mancu de sa dì a innanti, centuotantases in is atrus aposentus, chi funt otu de mancu, e 3981 incungiaus in domu.

Sa percentuali, chi est su 12%, de chini s’agatat in is aposentus, chi non siat sa terapia intensiva, in Sardigna abarrat oguali, ma calat in atras regionis che s’Abruzzo (a su 5%), s’Emilia Romagna (a su 5%) e in sa Valle d’Aosta (a su 2%).

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

Foto: https://www.comune.rivadelgarda.tn.it/Notizie-ed-eventi/Archivio-delle-notizie/In-evidenza/Green-pass-obbligatorio-per-tutti-i-lavoratori