Sabudu passau manifestada manna de is studentis in Roma, aprontada a pustis cussu chi est sussediu in Pisa, Firenze e Catania, aunia is studentis funt stetius scutus de sa politzia. Funt pedendu pagi, non fendu disatinus. E po custu is giovunus ant bofiu fairi intendiri sa bogi insoru. Sa manifestada est acabbada cun dd’unu presidiu a metrus pagu de su Viminali: a pustis essiri lompius in sa prassa de su ministeru, is piciocus funt torraus a palas in su tiatru de s’Opera e su presidiu s’est scagliau.
Sa manifestada est cumentzada in su pustis prangiu cun s’erribu, a pagu a pagu, de is piciocus, acumpangiaus de sa cantzoni de Ghalli “Casa mia” chi s’artziat a celu. Facis arrioladas cun cartellus de coloris meda: “Teneis is manus brutas de sanguni”; “Sa censura e is manganellus funt ogualis a su fascismu”; “Boleus cultura, nosi donais violentzia”; “Piantedosi, baidindi!”.
Da poi, comenti candu su soli ndi bessit de is nuis, is piciocus cumentzant a alluiri fumogenus e currint, totu paris, in denanti de su Viminali, cantendu massimamenti “Bella Ciao”. Funt prus de duamila, ma calencuna cosa de mancu po cussu chi narat sa giustissia.
A custa manifestada, nascia po morrungiai contras de is politziotus chi ant scutu, ant pigau parti s’Anpi, sa Cgil, ominis de su Pd, Avs, Steddaus, universitarius e colletivus. In prassa est finas lompiu su “leader” de is Steddaus Giusepu Conte, paris a Nigola Zingaretti po su Partidu democratigu e Massimilianu Smeriglio de Avs. Medas finas is parlamentaris e ativistas de is Steddaus: Ricardu Ricciardi, Stevini Patuanelli, Alisandra Maiorino, Filipu Scerra, Vitoria Baldino, Luisu Nave. Si ddue agataiant finas is consiglieris comunalis de Roma Diaco cun Meleo. S’atobiu de su cumentzu fut in denanti de su Tiatru de s’Opera, a su costau de su Viminali, sa “domu” de cussa genti chi in Pisa e Firenze non funt stetius lebius cun is studentis.
Màuru Mura
Lunis, su bintises de friargiu de su 2024
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.radiocolonna.it/cronaca/piantedosi-dimettiti-dopo-pisa-sit-in-degli-studenti-a-roma/
