Ilaria Salis mudat sa pensada sua e at a pediri de podiri passai su tempus de sa presonia in dd’una domu in Ungheria. Sa picioca de trintanoi annus, maista de scola e de arreigins sardas, s’agatat, de prus o mancu un’annu a cust’ala, in presoni in Budapest ca est incurpada de airi betau is manus in pissu a is militantis de sa destra prus funduda in dd’una manifestada in Budapest e totu.
Finas a oi sa pensada de pediri s’acapiu in foras de presoni non dda teniat né in su coru e nemancu in conca. Totu custu poita in Ungheria sa lei narat ca s’acapiu in domu balit una cuinta parti de sa pena de fairi apustis una cundenna. Est a nai, in pagus fueddus ca dogna dì passada in foras de sa galera, balit una dì de presoni.
A fairi sciri totu custu est su babbu Robertu, c agiai in is dis passadas iat atobiau is minustrus Nordio e Tajani, po cicai una solutzioni de sa presonia de sa figlia. Ma de s’atobiu cun is dus Robertu Salis ndi fut bessiu nieddu che sa pigi. “Sa nova est ca immoi s’agatant is imaginis de cussa dì. Ilaria at mudau pensada, massimamenti bistu da de prus partis est lompia sa pregunta de fairi istantzia po passai su tempus de sa presonias in calencuna domu in Ungheria. Immoi dda depeus cicai e in segus eus a pediri a is giuigis ungheresus”.
In is urtimus mesis sa chistioni de sa maista at fatu fueddai meda, non feti in Italia ma finas in s’orrestu de s’Europa, mascamente a pustis chi est lompia in tribunali in cadenas po s’udientzia. Acapiada in is bursus de is peis e de is brassus, tocat a dd’arregodai, ca est parta una bregungia po totus. Medas, in su fratempus, is manifestadas in totu Europa po pediri a bogi arta sa liberatzioni o s’arrespetu de is diritus umanus. Eus a benni a biri in su benienti cussu chi at a sussediri. Sa spera est manna po totus cussus chi bolint beni a Ilaria.
Màuru Mura
Lunis, su dogi de friargiu de su 2024
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.ilfattoquotidiano.it/2024/02/10/ilaria-salis-a-budapest-un-murales-con-una-donna-impiccata-a-una-forca-tajani-chiede-verifiche-allungheria/7442282/
