“S’Italia, in ocasionis medas, de arremonai s’urtima cun sa pesta, at sempiri amostau unidadi e arrespetu de is valoris de sa Costitutzioni. Custa, paris a s’Innu de Mameli e sa Bandela funt valoris mannus po totu is italianus e su fundamentu nostu est cussu de pagi, libertadi e diritus po is ominis”. Aici at nau su presidenti de sa Republica, Sergiu Mattarella, in d’unu messagiu in ocasioni de sa festa de s’Unidadi de sa Natzioni, de sa Costitutzioni, de s’Innu e de sa Bandela, chi oi s’arregodat in Italia.
“Centusessantadus annus a oi – Sighit su Presidenti – a suta de sa bandela a tres coloris, cun totu sa genti de acordiu, intrudemesu de su Risorgimentu, ant portau a fairi nasciri su Stadu italianu. Tocat a pensai a totu cussa genti, chi cun sacrificius e gana de gherrai, ant fatu nasciri s’Italia. In issus ddue funt cussus idealis mannus de pagi, libertadi e democratzia, chi, in segus, ant agatau sa domu in sa Costitutzioni”
“Biveus oi – aciungit Mattarella – cun sa guerra fata de sa Russia contras de s’Ucraina, un’amelessu a totu is valoris nostus chi nosi ponit in sa situatzioni de arrespundiri, totu paris, comenti de Europa. Depeus trabagliai po fairi acabai s’umperu de is armas e fraigai sa pagi”.
In Roma, po s’ocasioni, is celebratzionis in s’“Altare de sa Patria” ddue fut finas su presidenti de su Consigliu Giorgia Meloni. A acumpangiai sa festa fintzas is Frecce Tricolori.
Cavour ddu iat nau in cussu dixiaseti de martzu de su 1861: “Eus fatu s’Italia, immoi depeus fairi is italianus”. Sa pregunta chi lompit de su coru e de sa conca est: “Ce dd’ant fata a fairi is italianus?”. De cussu chi parit su caminu est galu longu, eus a benni a biri…
Màuru Mura
Cenarba, su dixiaseti de martzu de su 2023
Foto:https://firenze.repubblica.it/cronaca/2023/03/15/news/firenze_camera_commercio_conferenza_nazionale_mattarella-392269582/
