Atobiu a tres po fueddai de sa chistioni de su Quirinali. Custu mengianu su segretariu de su Partidu Democratigu Erricu Letta est lompiu a domu de Giusepu Conte, po atobiai is “leaders” de is Steddaus, Conte e totu, e de Leu Orrobertu Speranza. In sa mesa sa cuntierra po eligiri su Presidenti de sa Repubblica. In Twitter Letta at scritu de “un’atobiu andau beni meda cun Giusepu Conte e Orroberto Speranza. Eus a trabagliai paris po donai a s’Italia una o unu presidenti chi bagliat e chi siat arreconnotu de totus. boleus chistionai cun totus, depeus essiri responsabilis”.

Is matessi fueddus ddus ant umperaus is capus de is Steddaus e Letta at aciuntu: “Non eus fatu perunu nomini pooita ndi depeus fueddai cun su centrudresta in is dis de su benidori”.

Finas su meri de domu, Conte, est cuntentu: “S’atobiu est andau beni, nosu seus prontus. Tocat a ndi tirai de mesu is nominis chi funt feti de una parti. Boleus donai a s’Italia unu presidenti chi non si ndi facat bregungiai, prus a innanti feus is nominis”. Conte, in segus, at chistionau de s’indagu de Grillo: “Tengiu fidi manna e mi pogiu a su costau de Grillo”, at nau, “Apu bidu ca giorronalis medas ant donau pesu mannu a sa nova de s’indagu, ma tengiu fidi ca totu at andai beni”. Perunu fueddu, invecias, a cussu chi naraiant is Steddaus candu s’indagu fut po calencun’atru politigu.

Conte at a pustis aciuntu calencunu fueddu po sa chistioni de su Quirinali: “Candu eus a chistionai cun is atrus partidus de seguru eis a connosciri is nominis chi teneus in conca. Tocat a ndi tirai de mesu is nominis chi allirgant feti una parti politiga, comenti cussu de Berlusconi”.

Po connosciri su nomini chi su centrumanca at a fairi tocat, duncas, a tenni unu pagu prus de passientzia, ma parit, de cussu chi narat chini cumprendit, ca su nomini de Draghi o de su matessi Mattarella funt is prus probabilis.

 

19 de gennargiu de su 2022

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https://www.rainews.it/articoli/2022/01/quirinale-vertice-letta-conte-speranza-nessuno-ha-il-diritto-di-prelazione-serve-nome-autorevole-233a60d5-bd16-46e5-bd41-e5a678668718.html