“Soi sa prima presidenti femina de sa Regioni Sardigna”. Is fueddus de Alisandra Todde lompint in su noti intru de lunis e martis, de Casteddu, aunia po dda festai funt erribaus de Roma sa segretaria de su Partidu Democratigu Elly Schlein e su capu de is Steddaus Giusepu Conte.
Cun 1822 setzionis scrutinadas in pissu de 1844 sa candidada de su Campu mannu at tentu su 45,3% de is votus (in totu funt 330.619) contras su 45% (chi balint 327.619 votus) de su candidau de su centru destra, su sindigu de Casteddu Pàulu Truzzu.
Stesiau de meda Renatu Soru, candidau de sa Coalitzioni Sarda, chi cun pagu de prus de 63 mila votus, chi bolit nai s’8,7 %, abarrat a suta de su 10% e duncas a foras de su Consigliu Regionali.
Sa candidada de cuatru, Lughia Chessa de Sardigna R-Esiste, si portat a domu feti 7.200 votus, est a nai s’1%.
A pustis unu lunis longu de averas, a is cincu de mengianu sa Regioni at fatu sciri ca sa conta de is bintiduas setzionis chi funt abarradas (cuatru in Tatari, duas in Sorso, tres in Sestu, duas in Bonarcado, tres in Luras, duas in Musei, duas in Serdiana, duas in Silius, una in Santu Engiu e una in Biddesorris) at essi cumpletau, comenti narat sa lei, de is uficius de is Tribunalis de is matessis territorius.
Duncas cussu chi pariat dificili meda est sussediu in beridadi. A su cumentzu totus donaiant favoriu su sindigu casteddaiu, chi, a dogna manera, iat fatu mali is contus massimamenti cun sa citadi sua aunia nd’at boddiu una sonada manna.
Sa vitoria de Alisandra Todde lompit difatis de is citadis mannas, cun Casteddu, Tatari, Cuartu e Nuoro a innantis de totus, e abarrat prus stesiada in sa Gaddura e in Aristanis.
Immoi, apustis is festas, sa spera de is sardus est chi non certint po is cadiras e si pongiant totus a trabagliai po sa Sardigna. Ca ndi tenit bisongiu mannu!
Màuru Mura
Martis, su bintiseti de friargiu de su 2024
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.agenzianova.com/news/todde-attacca-di-maio-persegue-obiettivi-personali/
