Chi a drestra non funt postus beni a manca no est chi andit meglius po su scioberu de su candidau po is regionalis de su 25 de friargiu. Antzis, is candidaus po immoi, o sonumancu cussus chi si funt movendu funt dus: Arrenatu Soru e Alisandra Todde. Calencunu est torrau a corti comenti de Massimo Zedda, chi a su cumentzu fut cun Soru, ma chi, dapoi, po cicai s’unidadi de totu sa mesa de su centrumanca, est torrau a corti. A dogna manera, Soru at arrespustu a chini ddu cumbidaiat de torrai a trabagliai totu paris: “Non teneus perunu interessu a fairi pensadas eletoralis po su a pustis. Calencunu preferit a fairi matematica, contai is possibilis consiglieris regionalis eligius o is carrigas po su benidori. Deu prefergiu a fraigai una pensada politiga diversa po su oi e po su crasi, chi pongiat a su centru sa terra nosta. E bogliu chistionai de ideas, propostas, progetus comenti apu fatu e soi sighendu a fairi in is atobius medas in su territoriu aunia fueddaus cun sa genti de is comunidadis”.
Non s’est fata aspetai sa spusta, duncas, de Arrenato Soru a is Progressistas, chi ant lassau sa mesa sua po torrai in sa coalitzionis de su Partidu Democratigu cun is Steddaus chi sustenit sa candidadura de Alisandra Todde a sa presidentzia de sa Regioni. De inigui su partidu de Massimu Zedda at pediu a Soru de torrai po fairi una lista sola. Ma Arrenatu Soru andat a innantis cun sa fortza de is ideas.
“Nosu teneus unu progetu chi depit essiri un’alternativa a s’esperientzia de guvernu de destra ghiau de Solinas”, spiegat Soru, “e custu non bolit nai ponni foras is personis in is cadiras po atrus chi bolint fairi is matessis cosas: boleus mudai is prioridadis de guvernu, chi nde chi no est sa matessi cosa de a innantis”.
Soru narat de bolliri “pesai una fortza sarda chi tengiat, in su benidori, sa possibilidadi de diventai magiorantzia in Sardigna e ponni paris totu is fortzas de pensadas sardas, sardistas, autonomistas e indipendentistas chi tengiat in su coru su benidori de sa Sardigna”.
Màuru Mura
Mercuris, su dexi de gennargiu de su 2024
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.ansa.it/sardegna/notizie/2024/01/09/sardegna-soru-a-progressisti-no-ai-calcoli-elettorali_6d74c876-6979-43e2-aa24-b3de2437483d.html
