Po is discientis sardus torrat a sonai sa campanedda intru de milli dudas chi su “screening” bofiu de sa regioni non dd’ant tirau de mesu, e morrungius medas su matessi. Piciocus chi oi in is aposentus de is scolas non bolint intrai, presidis chi pedint sa Dad sonumancu finas a s’acabu de gennargiu e calencunu sindigu chi, invecias, fendu de conca sua at decidiu de serrai po un’atra pariga de dis “poita, a dolumannu, sa pesta, finas intru de is pipius, est andendeu a innantis”.

In Seulu scolas serradas e atrus otu sindigus morrungiant po no airi erriciu is tamponis po su “screening”: si podit sai ca funt medas is problemas po torrai a iscola a pustis is vacanzas de is festas de Paschigedda.

Su sindigu de Seulu Erricu Murgia at ordinau de serrai s’iscola a pustis chi at scipiu de dexi postivus in sa bidda. Iscolas chi abarrant serradas finas a sabudu chi benit finas in Crabas e Milis po mori de is impestaus meda.

In biddas medas de su Gerrei, est a nai in Santu Nigola, Scalebranu, Armungia, Silius, Ballau, Biddesartu e Santu Asili de Monti, su “screening” non c’est stetiu e is sindigus ant fatu sciri ca s’Ats non at mandau su personali sanitariu comenti s’ordinantzia regionali boliat. Su matessi est sussediu in Nurri.

In Isili, in pissu de centucoranta tamponis, feti unu positivu, ma funt una bintina cussus signalaus a s’Ats e non andat de certu meglius in is biddas lacanantis.

In Cabuterra is discientis de s’iscola, intregada a Sergiu Atzeni, ant pigau pinna e paperi po scriri a s’Ats e a su sindigu po pediri de non torrai a oberri po duas cidas, poita, imoi comenti imoi, non s’intendint segurus.

In Casteddu discientis medas pedint sa Dad su matessi e oi, po ddu fairi cumprendiri a totus, non funt intraus. “Su noranta po centu de nosu iant a preferri sa Dad – faint sciri – ca po comenti funt postas is iscolas est cuasi impossibili a sighiri is regulas chi teneus”.

 

Màuru Mura

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

 

Foto: https://corrieredelveneto.corriere.it/venezia-mestre/cronaca/22_gennaio_06/covid-presidi-scrivono-draghi-le-scuole-non-sono-posti-sicuri-cf1c4458-6f10-11ec-b417-3224d6852e8b.shtml