A s’acabbu de un’atra dì de passientzia e de cuntierra in su centrudestra, cun is Fradis de s’Italia – chi si faint fortis de is decisionis pigadas in sa mesa de sa coalitzioni – frimu in su nomini de su sindigu de Casteddu Pàulu Truzzu e Lega e Psd’Az in cussu de su guvernadori chi nd’est bessendu, Christian Solinas, de Roma, si narat “fiduciosu” in sa chistioni chi “su centrudestra at a torrai agatai s’unidadi in dd’una candidadura chi at a torrai a portai a sa vitoria, de chini at guvernau beni in custus cinc’annus dificilis, aunia eus cumbatiu cun su Covid e cun is guerras”.
Su presidenti de sa Giunta regionali est stetiu firmau in sa Capitali italiana aunia at tentu una bona pariga de atobius cun is concas de sa Lega e una ciaciarrada cun Mateu Salvini. “Una regula chi no est scrita narat chi si depat acabbai su trabagliu cumentzau. Seus chistionendu de relatas strintas intru de amigus – torrat a nai Solinas – chi depeus ponni a un’ala sa continuidadi tocat a ddu fairi cun arregionamentus politigus”. Sighimentu, narat, chi balit finas po su sindigu de Casteddu: “Soi cunvintu ca Truzzu, a su primu mandau comenti de sindigu, minesciat de portai a innantis cantu at fatu po sa citadi, comenti tocat a fairi po sa Regioni”. Chi, a dogna manera, is capus natzionalis ant a sighiri cun sa candidadura de su sindigu de Casteddu, Solinas at a bolli atobiai is dirigentis de su partidu. “Nosu comenti de Partidu Sardu de Atzioni decideus in Sardigna cun is fortzas nostas. Teneus un’alleantzia culturali e politiga cun sa Lega, po sa cali nosi intendeus e chistionaus de cussu de fairi paris. Cun serenidadi eus a decididi cussu de fairi, calechisiat at essi su nomini de sa mesa natzionali”, acabbat de nai Solinas. A sa pregunta chi sa Lega possat curriri chena de is Fradis de s’Italia arrespundit ca “Chi Salvini scioberat custu de ap’a rispetai custu scioberu e cun is dirigentis de su partidu eus a deciciri su caminu de fairi”.
Màuru Mura
Giobia, s’undixi de gennargiu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.regione.sardegna.it/regione/istituzione/presidente
