A pustis tres mesis de mari, de giogus e de spassiu, is pipius, e is piciocus sardus si torrant a setziri in is aposentus de is scolas. Oi in Sardigna cumentzat sa scola po totus. Ogus allirgus, massimamenti cussus de is pipius, chi non biant s’ora de torrai. Comenti cussu de ocannu passau cussu chi cumentzat oi at essi un’annu prenu de strobus cun su Covid che un’umbara po totu su mundu de sa scola. Est de arregodai ca po intrai in scola, a foras de is discientis, totus depint tenni su Green pass. Cuntentus meda funt is dirigentis de sa manera chi ant decidiu de cumpudai sa genti.
“Custa de umperai su computer e non su smartphone, est una manera lestra po biri chini sighit is regulas – faint sciri de su Sotziu natzionali de is presidis –. Su computer donat, a innantis, is nominis de totus cussus chi trabagliant in dogna scola e, a pustis, assentat chini non tenit su Green pass. Cun su telefoneddu fut prus dificili ca ci ponit prus tempus po ligiri su Qr code”.
Su Green pass, comenti eus giai nau, est obrigu po totu cussus chi trabagliant in sa scola e arregaodaus finas chi su 90% de custus est giai vacinau. Est obrigu finas po is babbus e is mammas chi acumpangiant is pipius a intru de is scolas maternas e elementaris: is figlius non depint tenni perunu documentu, ma issus giai, aici comenti chini e chi siat intrit.
“Sa spera est – sighint a nai de su sotziu de is presidis – chi totus andint a una parti e de non fairi torrai is discientis a is letzionis in domu cun sa Dad. Cun custa eus perdiu discientis meda, massimamenti in is scolas superioris. Su problema prus mannu no est su Covid, ma is scolas chi ndi funt calendu a orrogus”.
De oi s’at a biri chi corrieras e trenus ant essi bastantis, ca su sindacau timit de ddus agatai prenus de genti. Giai de is dis chi erribant s’at a biri!
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: http://www.officina-benessere.it/giorno-scuola-racconto/
