Un’atra dì de fueddus in Sardigna cun sa mirada de is eletzionis regionalis de su 25 de friargiu. De una parti sa Lega chi torrat a nai ca su candidau insoru est Solinas, in su mentris chi Antonella Zedda, coordinadora de Fradis de s’Italia, narat: “Po nosu, ma finas po sa parti manna de sa mesa regionali, su candidau a sa presidentzia de sa Regioni est Pàulu Truzzu. E sa mesa regionali depit essiri ascurtada”.

Fradis de s’Italia narat ca nou a sa Lega: “In Sardigna su candidau est Truzzu: sa mesa non podit essiri non ascurtada. De parti sua su Partidu Sardu de Atzioni, abarrau a su cumentzu citiu, at scritu unu paperi a nomini de su presidenti Antoni Moro: “ Sa mesa sarda, posta paris de Antonella Zedda est unu cogliunu, ca est stetia posta paris po tenni sa magiorantzia e no agatat beridadi in sa realtadi. Sa manera non si cumprendit e serbint pensadas politigas e bona volontadi, non fortzaduras”.

Sa Lega abarrat in is suas: “Perunu passu agoa in pissu de Solinas candidau. Po nosu balit sempiri a torrai a candidai unu sindigu e unu guvernadori chi ant trabagliau beni, comenti est sussediu in Abruzzo e in Piemonti”, at nau su capu de sa Lega Mateu Salvini, “cumpartziri su centrudrestra est una faddina, poita aici donas vantagius a sa manca, chi bolit nai a tenni prus genti chi lompit in Italia”.

Moro est dapoi torrau in sa chistioni de sa mesa regionali fueddendu de “assurdidadis chi cun su passai de su tempus ndi bessint a foras. Cumentzendu de sa manera umperada de sa coordinadora de Fradis de s’Italia, a intru de sa matessi mesa e cun su matessi diritu de votu, de consiglieris regionalis chi rapresentant issus etotu. Si depit partiri, duncas, de cussu chi iau decidiu in s’atobiu de sa borta de unu e donai bogi a su programma eletorali e a trabagliai paris po binciri”.

 

Màuru Mura

 

 

Mercuris, su dexi de gennargiu de su 2024

 

 

Attività realizzata col contributo della Regione Sardegna – Imprentas 2023-2024.

Legge Regionale 22/2018

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://mycagliari.blogspot.com/2017/07/il-palazzo-del-consiglio-regionale.html