Dus si coiant e de su corridoriu de su Cumunu de Varese ndi pesant su brassu, comenti faiant is fascistas e is cumbidaus arrespundint cun su matessi saludu. Est cantu narat s’Anpi, chi dd’at connotu in imaginis e videus chi ant girau in is social.
Su sociu natzionali de is partigianus pedit, cun urgentzia manna, chi sa giustissia facat connosciri su nomini de totu is calis apant saludau a cussa manera e a sa magistradura de oberri un’indagu po sa violatzioni de sa lei Scelba-Mancino.
Is sposus, comenti contat su presidenti natzionali de s’Anpi, Giuanni Francu Pagliarulo ddus at coiaus su capu de su sotziu nazista nou “Do.Ra.”, sa comunidadi de is varesinus de is “Dodici Raggi”, de sa cali su sposu fait parti.
“Inderetura a pustis sa coia, sighit a contai Pagliarulo, de su corridoriu de palatzu Estense, chi est su Cumunu de Varese, su sposu, acumpangiau de sa sposa, at saludau is cumbidaus cun su brassu artziau e custus ant arrespustu a sa matessi manera. Totus, e finas su sposu, bestius in nieddu”.
“Ci depit essiri una lacana, in prus de is leis chi teneus, finas in sa dignidadi costitutzionali, chi aici parit est stetia giumpada”, at sighiu a nai su presidenti de s’Anpi, su cali at arregodau: “Sa Corti de sa Cassatzioni at nau ca su saludu romanu si prenit de sa curpa de torrai a ponni in peis su partidu fascista ma custu est sussediu in dd’una istitutzioni comenti cussa de su Cumunu de Varese”.
Pagliarulo non ddas mandat a nai e pedit, in prus: “Comenti mai, a pustis is manifestadas medas chi lamant su fascismu e is disacatus, su matessi medas, giuditziarius su socitu Do.Ra., s’agatit ancora e nemus nd’apat pediu su scagliamentu”.
Serbit sa connoscentzia manna de is contus e de sa storia massimamenti po sighiri a cumbatiri contras de maneras de biviri chi non si podint biri.
Màuru Mura
Martis, su ses de friargiu de su 2024
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://video.corriere.it/cronaca/varese-matrimonio-saluti-romani-sede-comune/9d9246ee-c431-11ee-93f1-a16183fd09f8
