Ancora no est uficiali, ma Alissandra Todde s’intendit sa presidenti de sa Regioni e sighit a trabbagliai po su scioberu de sa scuadra chi at a andai a fairi sa Giunta sua.
Est bregungia de averas, ca a pustis cuasi binti dis de is eletzionis regionalis de su binticincu de friargiu, siaus ancora chena unu guvernu chi facat andai a innantis sa machina amministrativa. Comenti chi posseus aspetai e totu andessit beni. Ma su mundu funtzionat aici. Chi, a pustis, castiaus comenti est andada in Abrutzu su feli pigat de prus puru.
A dogna manera sa, po immoi, presidenti at cumentzau is ciaciarradas cun is partidus chi funt a intru de su Campu Largu po cicai de agatai unu acordiu, chena de certai a innantis de partiri.
“Seus aspetendu s’uficialidadi de sa vitoria – at spiegau sa Todde – seus giai trabbagliendu cun s’orrestu de sa coalitzioni po cicai de scaresciri su scarcasciu chi at fatu su centrudestra in is urtimus cinc’annus e donai a sa genti sarda unu guvernu spantosu chi si agatit inderetura a trabbagliai po sa sanidadi, su trabbagliu, is trasportus, is stradas, is giovunus, sa scola e is diritus”.
De cantu si lassat cumprendiri su Pardidu Democratigu – chi est su partidu prus votau de sa coalitzioni, tenit sa spera de si ndi pigai cuatru assessoraus, in prus de sa presidentzia de su Consigliu Regionali e sa de dus de s’esecutivu”
De cantu ndi bessit a foras, narat s’Ansa, sa governadora non iat essi a dispositzioni po donai a is democratigus ses postus de aici importu. Si pensat de ndi donai cuatru in totu, intru de assessoraus e atrus incarrigus.
A is Steddaus invecias, nd’iat a spetai dus e atrus dus funt cussus chi podit decidiri sa presidenti etotu. Unu ddu iat bolli finas sa lista “Uniti per Alessandra Todde”, chi comenti est stetiu nau at a diventai “Unu progetu politigu chi at a serbiri po su fraigamentu de unu movimentu chi si depit agatai in dogna territoriu”.
Màuru Mura
Mercuris su tregi de martzu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.la7.it/laria-che-tira/video/in-sardegna-vince-alessandra-todde-prima-governatrice-m5s-27-02-2024-528383
