Comenti mudat sa classifica de serie A. In sa parti bascai
A pustis sa bella e minescia vitoria de su Casteddu de sabudu passau, in s’Unipol Domus contras de sa Salernitana, donaus una mirada a sa parti bascia de sa classifica. Cussa aunia s’agatat su Casteddu e is atras scuadras chi gherrant po non ci calai in serie B. Eris est lompia sa vitoria de s’Udinese in domu de sa Latzio. Podit essiri unu spantu, ma una scuadra chi bincit, in su matessi campionau, in Milanu cun su Milan, in Torinu cun sa Juventus e in Roma cun sa Latzio, non podit prus spantai. Est a nai puru ca s’Udinese, po immoi, at bintu feti una partida intru de domu sua, e si podit nai, chena de farta, ca, po is giogadoris chi tenit, giogat meglius foras de domu.
Fustis nendu de sa classifica, dda castaius, cumentzendu de sa matessi Udinese, ca s’agatat a bintiseti puntus, est a nai a tres puntus de su Frosinone, a cuatru de su Sassuolo e a trexi de sa Salernitana. Custas tres scuadras, chi su campionau essit acabbau oi, funt cussas chi ci iant a calai in serie B. Dapoi de s’udinese, a bintises puntus, agataus su Casteddu pigau a bratzetu cun su Verona. Su spantu mannu est su Verona de averas, poita in su mesi de gennargiu at bendiu totus is meglius giogadoris. Non dd’at fatu contu s’allenadori Baroni e a postu in peis una bella truma chi si dda giogat cun totus. A binticincu puntus, sempiri a bratzetu, ddue funt s’Empoli cun su Lecce. Ma sa sistuatzioni de is duas est a s’imbessi. Su Lecce pariat ca fut fendu unu campionau in trancuillidadi, a su cumentzu finas spantosu, ma immoi, po abarrai in serie A si dda depit gherrai. S’Empoli, chi una pariga de cidas a oi pariat spaciau, a pustis s’erribu de Nicola comenti de allenadori, at fatu paricius puntus. Is urtimas duas partidas ddas at perdias, ma is piciocus toscanus si dd’ant gehrrada su matessi beni. Is postas peus, po s’ora, funt Frosinone, chi tenit su propriu contu de su Lecce, su Sassuolo e sa Salernitana. Custa, finas chi sa bocia est tunda, non ce dda podit fairi. Dda donaus comenti de spaciada. Po is atras duas scuadras chi ant acumpangiai is campanus si dda giogant in seti. Nosu, naraus Frosinone cun Lecce. Eus a benni a biri.
Màuru Mura
Martis su dogi de martzu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.violanews.com/statistiche/serie-a-classifica-aggiornata/
