Parit acabbau s’atra dì su campionau de su Casteddu ma si cumentzant giai a fairi is primus nominis po chini at essi  s’allenadori chi at a depiri provai a ci fairi torrai a bessiri is sardus in Serire A. Sa panchina de su Casteddu est ancora sbuida e ddu at essi, cuasi de seguru, finas a su cumentzu de sa cida ch’intrat. Pippo Inzaghi est su nomini chi si fait de prus, ma Capozucca no est trabagliendu feti po custu nomini. Atobius unu de fatu a s’atru cun su presidenti Giulini, po scioberai chini at a depiri setziri in d’una de is panchinas prus famadas de sa Serie B chi at a erribai.

In su cara a cara milanesu, Inzaghi at nau ca giai.  Scadiu su cuntratu cun su Brescia, su giogadori beciu de su Milan e de sa Juventus est prontu a torrai a partiri po cicai de agatai sa segunda promotzioni de sa Serire B apustis cussa cun su Benevento inde dus annus a oi, Inzaghi, chi est unu chi ddi pragit sa difesa a cuatr’ominis, pragit meda po sa gana manna chi ponit in panchina de fatu de dus annus legius giogaus sempiri cun s’abba in is gangas. A donai crobba est ca non s’iat acuntentati de una scuadra cun ominis de segunda fascia.

Funt finas atrus is nominis chi si faint: Luca Gotti, allenadori e 54 annus chi in Casteddu at fatu su segundu de Donadoni e massimamenti un’allenadori chi est abituau a trabagliai cun is giovunus: Aureliu Andreazzoli, sessantot’annus chi at sarvau s’Empoli e chi trabagliat de sempri cun is giovunus. Est de arregodai ca Andreazzoli est acanta de sa panchina de is piciocus de Giulini de fatu de candu ci ant bogau a Di Francesco ocannu passau, ma in segus su scioberu fut calau in Semplici. Imoi s’allenadori toscanu at lassu sa panchina sua a Zanetti, ma est de arregodai puru ca est unu de is meglius maistus de fubalu de sa Serie A e a torrai a partiri cun issu iat essi de averas una cosa beni fata… forsis prus de Inzaghi, chi portat su nomini ma atras virtudis chi immoi a su Casteddu no iat serbiri.

 

 

3 de làmpadas de su 2022

 

 

Màuru Mura

 

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

 

 

Foto: https://www.pianetagenoa1893.net/primo-piano/si-separano-le-strade-di-andreazzoli-e-dellempoli/