Sighit su Cesena, stesiada de noi puntus in su grinori B de sa Serie C, ma est sa de cuatru chi pigaus in cunsideru totu is campionaus italianus professionisticus. Su campionau, spantosu meda, de sa Torres est in numurus artus, chi feti atras tres scuadras arrennescint a giumpai.
Difatis, castiendu is campionaus de serie A, serie B e is tres gironis de sa serie C, est a nai, duncas, is centu scuadras professionisticas de su fubalu de is mascus, is piciocus de Alfonso Greco, funt is de cuatru cun sessantotu puntus fatus in trintunu partidas. In custa classifica sa scuadra chi at fatu prus puntus est s’Inter de Simone Inzaghi: setantacincu puntus in bintotu partitas. A is nieddus asulus milanesus sighint is biancus nieddus de su Cesena, ghiaus in panchina de Dominigu Toscano, chi de puntus nd’at postu a parti setantaseti, ma gioghendu tres partidas in prus de s’Inter. A innantis de sa Torres finas su Mantova, dirigiu de Davide Possanzini, chi ghiat sa classifica de su gironi A de sa Serie C. Po is virgilianus is puntus funt setantacuatru in is matessis trintunu partidas de is sassaresus.
Totu is atras scuadras funt a suta de sa Torres, finas sa Juve Stabia, chi cun sessantaseti puntus cumandat su gironi C de sa Serie C. Atra curiosidadi est ca castiendu is partidas ancora de giogai de immoi finas a s’acabbu de is campionaus, chi duas scuadras de importu comenti Milan e Juventus, o su Parma chi est sa de unu in Serie B, finas bincendu totu is partidas chi abarrant, po lompiri a sa giornada de trintunu, podint feti erribai e non lompiri is sessantotu puntus. Insoma, est unu campionau spantosu po is torresinus, chi de seguru at a arregalai atras galanias. Giai a partiri de sa partida benienti de dominigu a is duas de pustis prangiu in su stadiu Conero de Ancona cotnras de sa truma ghiada de Giuanni Luca Colavito.
Màuru Mura
Giobia su catodigi de martzu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.sassarinotizie.com/2024/03/02/la-torres-vince-in-casa-contro-il-pescara-4-1/
