Contras de su Genoa sa scuadra de Semplici at fatu dus gol, cun su capitanu Joao Pedro, de is undixi metrus e Ceppitelli de conca, ma is piciocus de Ballardini ce dda faint a binciri su matessi, torrendu gratzias a Destro e a Fares, chi giogaiat po sa prima borta, po duas bias. Acabat po 2-3 e su Casteddu abarrat cun su feli a pustis airi testau su meli.

Semplici no at possiu fairi giogai Strootman e Godin e at lassau Nandez setziu in panchina ca fut istracu meda, a pustis airi giogau una pariga de partidas in d’una cida cun sa Natzionali sua. Giogant Keita, e Pavoletti si setzis cussu puru, e Grassi e is ominis chi calant in campu, cun su 3-5-2, funt custus: Cragno, Walukiewicz, Ceppitelli, Carboni, Zappa, Marin, Deiola, Grassi, Dalbert, Joao Pedro, Keita.

Su Genoa de Ballardini, allenadori beciu de su Casteddu, arrespundit cun custus giogadoris: Sirigu, Biraschi, Maksimovic, Criscito, Sabelli, Sturaro, Rovella, Toure, Cambiaso, Pandev, Destro.

Su cumentzu de sa partida est de studiu intru de is duas scuadras, ma a pustis est su Casteddu a pigai su cumandu e aici erribant is dus gol. Pariat cosa fata e unu dominigu in allirghia po is sardus, ma no iant fatu is contus cun sa gana e sa barra de su Genoa chi in binti minutus at bortulau totu.

Semplici, a s’acabu at chistionau cun is giornalistas: “Po un’ora fustis meris de sa partida, gioghendu comenti iaus decidiu. Indenanti teniaus una scuadra chi scit giogai, no eus faddiu, ma eus sunfriu po is giogadoris chi mancaiant: de Godin a Pavoletti e de Strootman a Nandes. Finas Walukiewicz at pediu de ci bessiri. Finas a candu nos intendiaus beni ce dda eus fata, in segus eus pagau is sbaglius nostus. Ddu sciaus giai ca teniaus problemas, ma imoi tocat a non pensai meda a custa partida e a torrai a partiri inderetura de martis”.

Atra partida tostada cussa de dominigu chi benit: a is ses de merì cun sa Lazio de Sarri, in Roma.

 

Màuru Mura

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

Foto: https://www.youtube.com/watch?v=ZwRizFdbMKI