Sa Lega e su Partidu ancora non ce dda calant
Est galu artu s’anneu, ma Pàulu Truzzu si portat a innantis. Oi atobiat is fortzas politigas de sa coalitzioni de centrudrestra chi ddu ant sceberau a magiorantzia comenti de candidau a presidenti de sa Regioni.
S’atobiu at essi in Palatzu Tirso, in Casteddu, chi est stetiu giai tiatru de sa mesa de giobia passada, acabbada a pustis noi oras, chi, a dogna manera, non funt serbias a cunvinciri sa Lega e su Partidu Sardu de Atzioni a fairi unu passu a coa in pissu de su guvernadori in carriga Christian Solinas.
A is tres e mesu funt cumbidaus finas is dus partidus chi ancora no ant nau sa insoru po Truzzu. Ma at essi dificili chi ddue siant. Po su Psd’Az “Ancora non c’est unu candidau uficiali cumpartziu de totus”. Sa Lega no est aici tostada, cun su coordinadori Micheli Pais chi narat: “Seus galu fueddendu. Is Fradis de s’Italia ant fatu su nomini de Truzzu, ma ancora depeus decidiri. Nosu abarraus cunvintus ca su scioberu depit essiri cussu de su sighimentu de sa giunta becia”.
Fradis de s’Italia, a parrer sou, est siguru chi non ci siat peruna mesa natzionali in pissu de is chistionis sardas chi funt giai risolvias e acetadas de totus. Po custu Truzzu at decidiu de atobiai po sa bia de unu s’orrestu de sa coalitzioni. In s’atobiu s’at a chistonai de chistonis de organizatzioni a innantis de sa presentatzioni de is simbulus chi est intru de una cida, su cuindigi de gennargiu, e de is listas, chi depint essiri presentadas a intru de su bintidus de su matessi mesi.
“In pissu de su sceberu de su candidau a sa ghia de sa Sardigna s’urtimu fueddu est cussu de sa mesa natzionali e soi seguru ca at essi pigada sa decisioni prus sabia, in su interessu mannu de sa terra nosta”, at invecias nau, cun d’unu paperi, su deputau e coordinadori regionali de Fortza Italia in Sardigna, Ugo Cappellacci.
Màuru Mura
Lunis, s’otu de gennargiu de su 2024
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://it.m.wikipedia.org/wiki/File:Regione_Sardegna_palazzo.jpg
