Su programa de guvernu, de castiai in basi a sa sensibilidadi de su candidau a sa presidentzia de sa Regioni, s’aprontamentu de sa campagna eletorali, sa spera de si torrai a acostiai cun sa Lega e su Psd’Az.

Custas is chistionis in s’atobiu de eriseru intru de su sindigu de Casteddu Pàulu Truzzu, de is Fradis de s’italia, cun totu is fortzas politigas de su centrudrestra chi ddu ant postu in conca po is eletzionis regionalis de su 25 de friargiu. S’atobiu s’est fatu in videucunferentzia – e non in presentzia in Palatzu Tirso, comenti si creiat a su cumentzu – po mori de is impignus de Truzzu e de sa coordinadora regionali de Fortza Italia Antonella Zedda in Aristanis po su diretivu regionali de su partidu.

Truzzu narat inderetura: “Eja, mi intendu su candidau a sa presidentzia de sa Regioni”. A sa mesa tunda ddue furint totu is partidus de su centrudrestra, finas Fortza Italia cun su coordinadori regionali Ugo Cappellacci e su numuru dus Ivan Piras, foras de sa Lega e de su Partidu Sardu de Atzioni.

Su sindigu casteddaiu iat airi nau de tenni sa cunvintzioni de essiri su candidau uficiali, e aici iat giai nau in su mengianu in d’unu atobiu cun is giornalistas in su Cumunu. Po s’orrestu s’est chistionau de s’aprontamentu po presentai is simbulus a intru de su 15 de gennargiu e de is listas po su 22 sempiri de gennargiu.

Su capu de sa Lega Mateu Salvini at invecias chistionau nenduru ca is cuntierras cun is atrus partidus funt una “lastima” e ca po issu: “Is guvernadoris chi acabbant depint essiri torraus a candidai”. Ddu at nau in sa trasmissioni Quarta Repubblica de Nigola Porro, e at aciuntu: “Deu pensu ca chi unu sindigu – chistonendu de Truzzu – at trabagliau beni tocat a ddu torrai a candidai e a sa matessi manera chi unu guvernadori at trabagliau beni tocat a ddu torrai a candidai”.

 

 

 

Màuru Mura

 

 

Martis, su noi de gennargiu de su 2024

 

 

Attività realizzata col contributo della Regione Sardegna – Imprentas 2023-2024.

Legge Regionale 22/2018

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.ansa.it/sito/notizie/politica/2024/01/04/salvini-ora-basta-da-oggi-partono-le-querele_27b265cd-a5c4-487a-bcff-86414b203368.html