“Tengiu su cancuru, m’abarrat pagu tempus de biviri”. Sven-Goran Eriksson at lassau totus a buca oberta intru de s’intervista cun dd’una Arradiu svedesa. S’allenadori beciu de sa Latzio e finas allenadori de sa natzionali inglesa at nau: “Totus iant cumprendiu ca non bistaia beni, pensaiant chi tenessi su cancuru et est aici. Depu cumbatiri finas a candu ce dd’apa fairi”. At finas nau ca dd’abarrat tempus pagu: “In su meglius m’abarrat un’annu o calencuna cosa de prus, ma in su peus mancu custu. A nai sa beridadi nemus est seguru de nudda, est meglius a non ddue pensai. Podis cogliunai su ciorbeddu, pensai in beni e biri sa vida in sa manera meglius, chena si prangiri a pissu, ma cicai de pigai calencuna cosa de bonu finas in custu disacatu”. Totu est cumentzau cun dd’unu mancamentu: “Mi soi intendiu mali chena mi nd’acatai in su mentris chi fui fendu una cursigedda de cincu chilometrus, a pustis is controllus s’est amostau c aia giai tentu un’ictus e ca tengiu unu cancuru. Non sciu de cantu tempus, forsis de unu mesi o forsis de un’annu”.
Eriksson, connotu comenti de Svennis, in is corant’annus de carriera comenti de allenadori de fubalu, est su solu a airi bintu scudetu e cupa natzionali, in tres natzionis diversas: Svetzia, Portogallu e Italia. In custus tres stadus at bintu cincu bias su campionau e dexi intru de copas natzionalis e atras. Abarrendu in is treminis italianus Eriksson at bintu unu scudetu cun sa Latzio e cuatru bias sa Cupa Italia: duas cun sa Latzio, una cun sa Sampdoria e una cun sa Roma.
In s’orrestu de is manifestas de fubalu in Europa at finas bintu, sempiri cun sa Latzio una Cupa de is Cupas e una supercupa e una cupa UEFA cun su IFK Goteborg. In su 2001 est diventau s’allenadori de sa natzionali inglesa e s’at giogau is mondialis de fubalu de su 2002 e 2006 e is europeus de su 2004.
Màuru Mura
Sabudu, su trexi de gennargiu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.gloo.it/sven-goran-eriksson-rivela-ho-il-cancro-mi-resta-da-vivere-un-anno/
