Sa cica de Francisca Deidda, sa femina sparessia de Santu Sparau, aunia biviat, de sa metadi de su mesi de maju, sighint. Custu mengiau is cicadoris ant cumentzau in su sartu chi imboddiat su caminu beciu de sa Strada Orientali, po agatai calencuna arrasta de sa picioca chi, a cantu incurpat sa Procura de Casteddu, est stetia bocia de su pobiddu, Igor Sollai autista de camion de corantatres annus. Sollai de sa cida passada s’agatat in su presoni de Uta cun s’acusa, sempiri po is magistraus, de airi bociu sa pobidda e po airi, in segus, atacau su corpus.
A trabbagliai in sa cica, de mengianu acoidu, is carabineris de sa Cumpangia de Iglesias e is Cassadoris de Sardigna. Funt cichendu massimamenti in s’area chi giai in is dis passadas iant postu suta atentzioni, bia su chilometru 35 de sa Orientali Sarda becia, aunia sa cida passada iant agatau calencuna cosa. Ma funt cichendu finas in atrus logus. Po immoi non funt ancora lompius is canis “molecolaris”. Si funt galu aspetenduru is arresurtaus biologicus de is carabineris de is Ris in pissu de su “bite” de is dentis, arreconnotu comenti de Francisca Deidda, agatau in sa prima dì de cica, chi unu odontotecnicu iat nau comenti de cussu fatu po sa femina, ma finas is arrastas de sanguni agratas in dd’una corona e in dd’un orrogu de una felpa.
In su mentris, sa bidda de Santu Sparau aunia biviant de doxi annus pobidda e pobiddu, eris s’est strinta a ingiriu de sa familia e de is amigus de Francisca cun dd’una fiacolada a sa citicia, chi a dogna manera fut comenti unu aboginai su dolu mannu. C’at pensau s’aministratzioni comunali de sa bidda de is murales chi at donau su nascioni a s’artista mannu, Pinuciu Sciola e ant partecipau in prus de duamila sparadesus.
No est mancau mancu su fradi de Francisca, Andria Deidda e nemancu su babbu cun sa mama de Igor Sollai.
“Eus fatu su caminu a sa citia po fairi fueddai is corus nostus e po fairi intendiri is passus”, at nau su predi de Santu Sparau, Antonio Cirulli.
Màuru Mura
Lunis, su cuindixi de mesi de orgiolas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.ansa.it/sito/notizie/cronaca/2024/07/11/donna-scomparsa-trovati-altri-indumenti-e-straccio-con-sangue_706051ce-88a9-47d9-ba80-ae23568a7444.html
