In domu insoru non si podiat abarrai cun sa bestimenta de crocai poita “bolit nai ca unu est mandroni”. Non si podiat bufai su zabaioni o su binu caglienti “poita est cosa de becius”. E chi unu teniat famini non podiat papai intru de prangiu e cena o a mengianu po smurzai, nou, po nudda poita chi nde chi no: “ingrassas”.

Funt feti una bona pariga de regulas chi su pobiddu cumandaiat a sa pobidda. Est facili de cumprendiri ca su clima in domu de is dus non depiat essiri de is meglius, ca s’umiliatzioni e su cumandu de s’omini fut cosa de macus. Po totu custu unu manager chi trabbagliaiat in sa Provincia de Torinu est stetiu cundennau a tres annus de fairi, a dogna manera, no a intru de presoni ma in domu.

S’omini depiat arrespundiri po is curpas de stalking, po airi tratau mali sa pobidda, dannegiamentu e po imbucai in sa posta eletroniga de sa pobidda chena airi perunu permissu.

In is arregionis de su tribunali de Torinu, decidias de sa giuigessa Milena Giara Lombardo, sa lista de cussas regulas chi s’omini cumandaiat in domu sua cun “manera de fairi de cumpundu, avilenti e barrosimini”.

In prus de cussas giai arregodadas, su manager de sa Provincia de Torinu, boliat chi mancu unu biculu de pani andessit fuliau e a sa matessi manera obrigaiat sa pobidda a papai finas su cociolu de su sartitzu, E galu: obligu de non ponni is cuidus in pissu de mesa, de serrai sempiri sa janna de su bagnu, de non papai petza de cuaddu cota pagu e non podiri ponni licori in pissu de su gelau.

Sa pobidda iat contau totu custu in s’aposentu de su tribunali. E gratzias a su coragiu de denunciai su pobiddu nd’est bessia de sa chistioni. Est finas de nai ca s’omini fut finas violentu cun is manus e dogna tanti sa pobidda buscaiat finas cropus. Ma, immoi, est totu acabbau e sa femina si podit fairi un’atra vida.

 

 

 

Màuru Mura

 

 

 

Cenarba, su dixiaseti de gennargiu de su 2025

 

 

Attività realizzata col contributo della Regione Sardegna – Imprentas 2024-2025. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018

 

 

Foto: https://procura-torino.giustizia.it/it/chi_siamo.page